Словацька влада схвалила актуалізованый Акчный план охраны прав народностных меншын

Влада Словацькой републікы схвалила в середу 28-го октобра 2026-го року актуалізовану пропозіцію Акчного плану охраны прав народностных меншын на рокы 2026 – 2030. Як інформовала аґентура TASR, документ встановлює чотыри стратеґічны і вісем операчных цілів, із цілковым чіслом 25 актівностей.

Уряд влады СР як передкладатель звернув увагу, же пропозіція рефлектує потребу ревізії штруктуры акчного плану із попереднього періоду – років 2021 – 2025, котра была конціпована на основі семох операчных цілів.

Чотыри стратеґічны цілі

„Переважна часть дотеперішніх актівностей зіставать захована в модіфікованій подобі і про слідуючій імплементачный період, і далше представлює основны рамкы кроків у области охраны прав народностных меншын і етнічных ґруп,“ інформовав Уряд влады СР.

Чотырьома стратеґічныма цілями в схваленій подобі акчного плану суть посилніня правного поставліня і інформованости о меншынах, розвиток інклузівной і якостной освіты членів народностных меншын, хоснованя реґіоналных або меншыновых языків в практіці і медіях, як і сістемова підпора културы а база знань.

„Основным прінціпом акчного плану є створіня простору і форм партіціпації народностных меншын і етнічных ґруп на реалізації пріоріт, якы выходять із проґрамовых документів влады СР так, жебы при їх уплатніню были взяты до відома оправданы потребы членів народностных меншын, і жебы їх реалізація помагала ку забезпечіню рівности принагод в практіці,“ додав Уряд влады.

Єдночасно звернув увагу на то, же до концепції імплементовав оціньованя експертів о згоді тых кроків із Европсков хартов реґіоналных або меншыновых языків, і рекомендації Комітету міністрів Рады Европы.

Нелем захованя, але і розвиток комуніт

Уповномоченый влады СР про народностны меншыны Акош Горонь звернув увагу на то, же схваленый акчный план творить стабілны рамкы про охрану і розвиток прав народностных меншын в слідуючіх роках.

„Словацька републіка буде діспоновати середньодобыма  стратеґічныма цілями заміряныма нелем на захованя, але і далшый розвиток народностных комуніт. Ціленый і адресный приступ ку потребам членів народностных меншын є предположіньом на досягненя реалной рівности в штоденнім жывоті,“ сконштатовав.

Горонь є пересвідченый, же выбратый приступ поможе конштруктівному, передвидимому і консензуалному розвитку народностных комуніт на Словакії.

Матеріал і біланцує

Схваленый матеріал презентує і біланцію повніня задач в попереднім акчнім плані. Наприклад в припаді задачі реалізовати културны актівности і неформално-освітні події в области културной дідовизны народностных меншын інформує о тім, же в моніторованім періоді зреалізовали културны інштітуції понад 1500 актівностей.

Фото: Pixabay.com/myshoun.