Сумар дня на 30. жолтня/октобра 2026 р.

Приносиме вам сумар медияльной ґрупы ЛЕМ.фм+ на ден 30. жолтня/октобра 2026 р.

Апель о желізничне получыня Новый Санч-Ґрибів-Ґорлиці-Біч-Ясло-Стрижів-Ряшів

Президент Нового Санча і бургомайстры Ґрибова, Ґорлиц, Біча і Ясла вєдно апелюют о увзглядніня безпосереднього желізничного получыня на трасі Новый Санч-Ґрибів-Ґорлиці-Біч-Ясло-Стрижів-Ряшів. 26. жолтня/октобра в Ґорлицях підписали спільне становиско тыкаюче розвитку державной сіти желізничных получынь в рамках прац над Горизонтальным Розкладом Ізды. Самоурядовці звернули ся з просьбом проанализувати можливости одкрытя безпосереднього желізничного получыня, што получыт східню част малопольского воєвідства з полудньовом частю підкарпатского воєвідства, через Ґрибів, Ґорлиці, Біч, Ясло і Стрижів. Получыня мало бы злегшыти жытелям меджереґіональны подорожы, поправити доступ до адміністрацийных, едукацийных і господарчых осередків, як і сперти розвиток туристикы і локальной економічной активности. Самоуряды задеклярували готовіст до дальшой спілпрацы при анализах і консультациях тыкаючых пропонуваного напряму.

Малопольща хоче быти місцьом розвитку дроновых технолоґій

Завершыло ся чергове Крениця Форум. Політикы, експерты і самоурядовці дискутували на ним о найважнійшых вызвах для Польшы. Єдном з порушеных тем была безпека і охорона здоровля. Як подал маршалок Малопольского Воєвідтсва Лукаш Смулка, хотят довести до того, жебы Малопольща была найбезпечнійшым реґіоном і найліпшым місцьом до жытя і працы в Польщы. Єдным з найважнішых пунктів інавґурациі Крениця Форум 2026 было підписаня порозумліня о спілпрацы для розвитку дроновых технолоґій і технолоґій подвійного застосуваня. Під документом зложыли підписы представникы самоуряду воєвідства, академіцкого середовиска і інституций підпераючых господарчый розвиток реґіону. Задеклярували спілпрацу при бадавчо-розвитковых проєктах звязаных з выкорыстаньом дронів, вводжыньом інновацийных технолоґій і посиляньом спілпрацы медже науковым середовиском і господарком. Порозумліня має быти імпульсом для розвитку модерных технолоґій в Малопольщы і зміцнити позицию реґіону як державного лідера інновациі.

Повітова дорога з Крениці до Тылича єст уж переіздна

Завершыли ся головны ремонтовы працы при повітовій дорозі з Крениці до Тылича (ул. Пулаского в Креници). Дорога єст уж переіздна на цілным ремонтуваным одтинку. В тым тыжни положена была послідня верства асфальту. Фінальны працы, в тым ознакуваня дорогы, мают потырвати іщы до кінця листопада/новембра. Інвестиция зачала ся іщы в серпни/авґусті 2025 р. Цілковитый кошт перебудовы одтинка дорогы має вынести близко 11 млн злотых. Кошты покрывают ґміна Крениця і Повітове Староство в Новым Санчу.

Три новы ратівничы квады трафлят до стражаків в Баници, Снітници і Устю Рускым

Ґміна Устя Рускє купит три ратівничы квады з выпосажыньом, котры мают зліпшыти діяня пожарників в тяжко доступных рейонах Низкого Бескіду. Потреба была перше зГолошувана стражаками. На обшыри ґміны Устя Рускє діє десят єдиниц Охотничной Пожарничой Стражы, но актуально лем дві з них мают в своім выпосажыню такы поізды. В результаті анализы загорожынь выступуючых на обшыри ґміны, нове ґратя трафит до єдиниц в Баници, Снітници і Устю Рускым. Поізды мают скоротити час реакциі ратівників і уможливити дотертя до місц недоступных для тяжкых пожарничых авт. Закуп в квоті 366,7 тис. злотых єст фінансуваный в рамках Проґраму Охороны Людности і Цивільной Обороны на рокы 2025-2026, з вкладом власным з буджету ґміны Устя Рускє. Термін реализациі задачы то 10. грудня/децембра тр.