Сумар дня на 9. листопада/новембра 2026 р.

Приносиме вам сумар медияльной ґрупы ЛЕМ.фм+ на ден 9. листопада/новембра 2026 р.

Висловлюєме щыре спілчутя родинам пострадавшых в Кракові

З великым жальом приняли сме вісти о траґічным атаку, до котрого дошло 7. листопада/новембра в Кракові. В імени Стоваришыня «Руска Бурса» в Ґорлицях і Медияльной Ґрупы ЛЕМ.фм высловлюєме щыре спілчутя родинам і близкым пострадавшых. В тых тяжкых хвилях лучыме ся в болю зо вшыткыма, котрых доткнула тота траґедия.

«Gorlicia Ruthenica. Слідами Лемків в довоєнных Ґорлицях»

19. листопада/новембра в Рускій Бурсі мож буде выслухати прелекцию з назвом «Gorlicia Ruthenica. Слідами Лемків в довоєнных Ґорлицях». Ґорлиці были містом о характері погранича, місцьом стріч ріжных культур, віроісповідань і традиций. Через столітя розвияли ся як ремісничо-гандльовый осередок, а кіньом 19. столітя, в результаті розвитку нафтового промыслу, стали ся єдным з важнійшых господарчых центрів в Ґалициі. Процес тот тырвал тіж в меджевоєнным періоді. Розвиткови промыслу товаришыло возниканя фінансовых, господарчых і соспільных інституций, розбудова адміністрациі і суду та розвиток шкільництва. Переміны мали значуче влияня на соспільну структуру міста. Історичні жыли гев предовшыткым Полякы і Жыды, але важну, хоц меншу ґрупу становили Русины. Важну ролю в жытю той соспільности одгрывала Руска Бурса, яка была місцьом не лем закватеруваня молодежы, котра вчыла ся в ґорлицкій ґімназиі, але і осередком освітовой, культурной і соспільной діяльности. Зосереджала представників місцевой інтеліґенциі і молодіж з лемківскых, часто далекых сел. Русины было частю штоденности міста, брали участ в розвитку Ґорлиц і цілого реґіону. Прелекция, яку выголосит Даміян Новак з Музею Бічской Землі, буде нагодом, жебы м.ін. призріти ся менше знаній істориі міста, одтворити соспільну топоґрафію русиньскых Ґорлиц, припомнути особы, інституциі і подіі звязаны з місцевым лемківскым соспільством. Стріча пройде в четвер 19. листопада/новембра о 17.00 год. в Рускій Бурси в Ґорлицях. Подія реализувана завдякы дотациі Міністра Внтрішніх Справ і Адміністрациі. Просиме!

Анімацию «Еха» запрезентуют на фестівали в Ґданьску 

Кінцьом того місяця в Ґданьску мож буде обізрити Анімацию «Еха». Проєкция пройде в рамках фестівалю «Euroshorts», што промує польскы і медженародны короткы фільмы. Образ бесідує о втраті і памяти, єст інспіруваный насильным выселіньом Лемків з 1947 рока. Авторком анімациі «Еха» єст Йоанна Фучко – лемківска інтердисциплинарна артистка з Зеленой Горы. Образ фурт приносит самы успіхы, был презентуваный на вельох престіжных фестівалях. При нагоді припоминаме, што іщы лем до найблизшой неділі 15. листопада/новембра в Ґалериі Центра Творчых Діянь в Любіні мож обзерати выставу авторства Йоанны Фучко з назвом «eLEMentarz», што проходит в рамках циклю «Лемкы в Центрі». Артистка сігат до корени і через сучасны ілюстрациі вказує слова в лемківскым языку. Іх значыня, звучаня і асоцияциі остают заложыньом до бесіды о дідовизні і пробі єй захованя.

Торжества з нагоды свята копальників в Любіні

Нижньошлезскє Православне Копальниче Братство просит до участи в торжествах з нагоды свята копальників – Барбуркы. В календари є то 4. грудня/децембра, коли приводит ся памят о Святій Варварі, покровительці копальників. Святкуваня пройдут в пятницю 4. грудня/децембра в православній парохіі св. Тройці в Любіні. Зачнут ся од Св. Літургіі правленой в інтенциі копальників і іх родин. Богослужыня з нагоды Дня Копальників правлене єст в православній парохіі св. Тройці в Любіні каждого рока. Святкуваня обняло своім патронатом KGHM Польска Мідь.