У Відню припомянули собі 330 років од слызіня Маріяповчаньской іконы

Почас вікенду 7-го і 8-го новембра 2026-го року у Відню одбыла ся молитовна стріча в Катедралі святого Штефана, котру орґанізовала Віденьска архідієціеза. Церьков припомянула собі тов подійов 330 років од першого слызіня чудотворной іконы Пресвятой Богородіці із Маріяповчі.

На тото торжество до Відня пришли єпіскопи, священици і віруючі із різных католицькых церьквей, передовшыткым із тых, котры суть наслідниками Ужгородьской унії. На юбілейній події брав участь віденьскый римокатолицькый архієпіскоп Йосеф Фрынвідл, як і кардінал Хрістоф Шенборн – емерітный віденьскый архієпіскоп.

Присутны были і восточны католицькы єпіскопи. До Відня пришли вшыткы трьоми владыкове із Мадярьска, де Маріяповч находить ся – голова Ґрекокатолицькой митрополітной церькви в Мадярьску Высокопреосвященый владыка Філіп Кочіш, архієпіскоп митрополіта гайдудороґскый, далше мішколцьскый єпарха кір Атаназ Орос, як і ніредьгазьскый єпарха кір Авел Сочка.

Із Словакії пришов Высокопреосвященый владыка Йона Максим – пряшівскый архієпіскоп митрополіта і голова Ґрекокатолицькой церькви на Словакії, Высокопреосвященый владыка Кіріл Василь – кошыцькый єпарха, Преосвященый владыка Мілан Лах – братіславскый єпарха, і кір Маріян Андрій Пацак – апостольскый візітатор про ґрекокатоликів із Словакії, котры жыють в западній Европі.

Участь взяв і мукачовскый єпарха кір Теодор Мацапула, крижевацькый єпарха кір Мілан Стіпіч, як і далшы єпіскопи.

В суботу быв у центрі духнового проґраму Акафіст ку Пресвятій Богородіці, молитва тіпічна про візантійску традіцію. Акафіст молив ся у веце языках. На кінцю торжества участны ішли в процесії із свічками Площов святого Штефана вєдно із чудотворнов іконов, котру несли поступно священици і владыкове.

В неділю головным пунктом проґраму была торжественна архієрейска літурґія, котрой головным служытельом быв Высокопреосвященый владыка Філіп Кочіш.

Стріча у Відню припомянула чудо із 4-го новембра 1696-го року, коли ікона Богородіці в храмі в селі Маріяповч почала слызыти перед віруючіма. В 1697-ім році бы оріґінална ікона перенесена до Відня, де в Катедралі святого Штефана сохранять ся доднесь.

Фото: Ніредьгазьска єпархія.