В неділю 8-го новембра 2026-го року в Сербії членове народностных меншын могли голосовати у выборах, котрыма собі на далшы чотыри рокы выберали своїх представителів в націоналных совітах.
У четверь 12-го новембра Републікова выборча комісія публіковала офіціалны резултаты, котры дакус змінили частковы резултаты публікованы такой в понедільок по выборах. Переможця выборів до Націоналного совіту Русинів має о єден мандат веце в 19-членнім самосправнім орґані в порівнаню із першов проґнозов.
Право голосовати у выборах до Націоналного совіту Русинів мало 6 933 особ, і голосовало 3 330 людей. То представлює участь на уровни 48 процент. Голосовало ся на 187 місцях. Платных голосів было 3 311. Кандідовали 4 кандідачны спискы, із того три здобыли мандаты. Чотыри рокы тому кандідовало 5 списків, і вшыткы здобыли мандаты.
За офіціалныма фіналныма резултатами выграв кандідачный список під чіслом 3 із назвов На волні перемін (оріґ. На габи переменкох), котрый здобыв 66,7 процент голосів. Наконець має 14 мандатів у 19-членнім совіті, і абсолутну векшыну. Першы проґнозы му приписовали 13 мандатів.
Кандідачный список під чіслом 1 Русины довєдна (оріґ. Руснаци вєдно), котрый выграв два попередні выборы, і перед 4-ма роками мав понад 23 процент і 10 мандатів, в новім складі совіту буде мати скромнішу репрезентацію. Русины довєдна здобыли теперь 16,5 процента, што їм забезпечіло лем три мандаты.
Під чіслом 2 быв кандідачный список Щіро за Русинкы і Русинів – проф. Др. Михайло Фейса (оріґ. Щиро за Рускинї и Руснацох – проф. др Михайло Фейса). За офіціалныма резултатами здобыв тот список 13,7 процента голосів, і в новім складі совіту має 2 мандаты.
Фейса быв у пепередніх выборах чотыри рокы тому лідером кандідачного списку Руська матка за Русинів (оріґ. Руска матка за Руснацох). Здобыв втогды 3 мандаты і мав другу найвекшу кількость голосів по Русины довєдна, теперь скінчів аж на третім місці, і має о єден мандат менше.
Без мандату зістав кандідачный список чісло 4 Музика Русины Славко Роман Рондо (оріґ. Музика Руснаци Славко Роман Рондо), котрый здобыв лем 3,14 процента голосів.
Фото: Рутенпрес.







