Приносиме вам сумар медияльной ґрупы ЛЕМ.фм+ на ден 13. листопада/новембра 2026 р.
Русиньскій проґрам в рамках Конвенциі ASEEES
В Зъєднаных Штатах Америкы, в Шікаґо, проходит Дорічна Конвенция Стоваришыня над Досліджаньом Славян, Східьой Европы і Евразиі. В рамках той медженародной подіі єст і русиньскій проґрам. В панели о лінґвістиці будут штырі выступліня: «Стандаризация підкарпатского русиньского: нова вступна ґраматика» Томаша Калинича з Карльового Університету в Празі, «Медже кодифікацийом і хоснуваньом: динаміка лемківской топоніміі» Клавдиі Новак з Ягайлоньского Університету, «Веце як словник: Контекстуальный Словник Лемківского Языка» Олены Дуць-Файфер з Ягайлоньского Університету і «Вчыня плюріцентричного языка: комунікацийный підхід до пряшівского, лемківского і підкарпатского русиньского» Натана Маркса з Оклягомского Університету. Буде тіж округлый стіл, якій буде продолжыньом дебат ведучых дослідників карпаторусиньской літературы, тыкаючых будучности той обшыри. Його участниками будут Ніколяс Купеньскій з Академіі Повітряных Сил ЗША, Олена Дуць-Файфер, Давид Повелсток з Університету Брандайса і Алі Каракая з Універистету Станфорда. Третій панель буде о штуці. Выступліня буде мало троє прелеґентів: Павел Роберт Маґочій з Університету Торонто – «Підкарпатска Школа Малюваня», Ніколяс Купеньскій – «Репрезентуваня карпато-русинскых Американів: штука ренесансу угльвого реґіону» і Михал Шымко з Варшавского Університету – «Сучасна лемківска штука: достоменніст, памят і естетика». Додатково, Карпаторусиньскій Дослідничый Центр орґазнізує в рамаках конвенциі подію присвячену др Патрициі Крафчік, яка єст дослідничком і популяризаторком істориі і культуры Русинів.
Mолитовна стріча в Катедрі святого Штефана в Відни
7. і 8. листопада/новембра в Відни одбыла ся молитовна стріча в Катедрі святого Штефана, котру орґанізувала Віденьска Архієпархія. Церков припомянула собі том подійом 330 років од першого слезіня чудотворной іконы Пресвятой Богородиці з Марияповча. На тото торжество до Відня пришли єпископы, священникы і вірны з ріжных католицкых церкви, предовшыткым з тых, котры сут наслідниками Ужгородской Уніі. В суботу был в центрі духнового проґраму Акафист ґу Пресвятій Богородиці. На кінци торжества участны ішли в процесиі зо свічками Площом святого Штефана вєдно з чудотворном іконом. В неділю головным пунктом проґраму была торжественна архієрейска літургія. Стріча в Відни припомянула чудо з 4. листопада/новембра 1696 року, коли ікона Богородиці в храмі в селі Марияповч почала слезити перед вірныма. В 1697 році была оріґінальна ікона перенесена до Відня, де в Катедрі святого Штефана сохранят ся доднес.
«Ґалиция і єй дідовизна – дебата в 150. річницю одкрытя желізничной леніі в Новым Санчы»
В середу 18. листопада/новембра в Малій Ґалериі в Новым Санчы пройде подія з назвом «Ґалиция і єй дідовизна – дебата в 150. річницю одкрытя желізничной леніі в Новым Санчы». Орґанізаторами подіі сут Реґіональный Осередок Медженародной Дебаты в шлезскым і малопольскым воєвідстві, Польско-Австрийскє Товариство в Новым Санчы і Стоваришыня Сандецкій Штетль. Публична задача єст фінансувана Міністерством Зовнішніх Справ Польской Республикы в конкурсі «Реґіональны Осередкы Медженародной Дебаты 2025-2026».







