Ніч музеїв у Музею модерного уменя Анді Варгола

Музей модерного уменя Анді Варгола і того року залученый до події Ніч музеїв, котра буде проходити дня 16-го мая 2015 р. На події, почас котрой маєте можливость видіти експозіцію музеїв бесплатно, на вас в Міджілабірцях знова чекать богатый проґрам, котрый музей приготовов вєдно з Обществом Анді Варгола.

Проглядку музейной експозіції з фаховов лекціов будуть навщівници годны видіти о 14.00, 17.00 і 19.00 год. В часі од 14.00 до 16.00 год. і од 18.00 до 20.00 год. суть приготовлены вытварны варштаты.

І того року собі почас того дня будете годны зробити властне варголовске трічко (кошулька). Од 14.00 до 17.00 год. буде проходити подія sprayANDY/T-shirt. Потрібне є собі лем принести властне трічко, на котре собі можете наспрейовати єден із популарных варголовскых мотівів і так мати своє оріґіналне трічко.

В часі од 19.00 до 21.00 год. буде в просторах Art Café Музею модерного уменя Анді Варгола проходити промітаня документарных філмів о найзнамішым Русинови – Анді Варголови.

Цілый проґрам є бесплатный. Сердечно запрошаме.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА