В Ужгороді одпрезентують моноґрафію о Федорови Манайлови

Як інформовала Ужгородьска містьска рада, в пятніцю 23-го октобра 2026-го року в просторах Закарпатьского областного художного музея імени Йосифа Бокшая одбуде ся презентація новой моноґрафії, яка є присвячена славному коріфейови Підкарпатьской русиньской малярьской школы – Федорови Манайлови.

Авторков україноязычной моноґрафії, котра має назву Федір Манйло: сторінки життя і творчості, є Вікторія Манайло-Приходько. Авторка є внучков славного русиньского маляря.

Окрем того Вікторія Манайло-Приходько є професіоналным кунстісторіком, учіть на Закарпатьскій академії умень, є членков Націоналного общества художників Україны і ведучов Меморіалного будинку – Музея Федора Манайла в Ужогороді.

„Моноґрафія стала резултатом многорічной бадатальской роботы і одкрывать малопознаты сторінкы жывота і творчости Федора Манайла. У книзі пояснены суть різны напрямы умелецького доробку художника, його педаґоґічна і общественна діятельность, вклад до розвитку културы краю,“ інформовала Ужгородьска містьска рада.

Выданя є доповнене архівныма документами, знимками, репродукціями творів і споминами сучасників.

Музично збогатить подію выступліня Націоналного заслуженого академічного Закарпатьского народного хору під веджіньом Наталії Петій-Потапчук. Ансамбель одпрезентує композіцію під назвов Карпатьска рапсодія, котра є присвячена памяти Федора Манайла.

Федор Манайло (рр. 1910 – 1978) быв родаком із села Іванівці. До історії записав ся як русиньскый малярь, ґрафік, педаґоґ, умелець молодшой ґенерації Підкарпатьской русиньской малярьской школы.

Быв абсолвентом Умелецько-промысловой школы в Празі, міцно овпливненый чеськыма експресіоністами і сурреалістами. Быв великым знательом гуцульского уменя і міфолоґії. Експресівно зобразив свої знаня в монументалных образах Гуцулів, Гуцулок і їх народных обрядів.

О Федорови Манайлови мож бісідовати і як о основательови русиньской малярьской дінастії. Вызначным малярьом став і його сын Іван Манайло, а в родинній професії є успішный і внук Андрій Манайло, котрый жыє в Мадярьску.