«Маганой Сіті – місто Емілия Кубека» – прогулька слідами священника

В Старым Краю мало знаме о выдатных Русинах, котры з Карпатской Руси ішли за велику воду не за хлібом, а за своіма людми, жебы там нести ім поміч, служыти, быти моральном підпором. Таком персоном был о. Емілий Кубек (1857-1940), грекокатолицкій священник, писатель, автор  церковнославяньско-мадярско-росийско-німецкого словника, народжений в Штефурові на Пряшівскій Руси.

Феномен Кубека доціняли його парафіяне іщы в Старым Краю. Был не лем аніматором культурного жытя, діячом, застараным о свою околицю, але і вчыл люди садити компері за плугом, помагал парафіянам розвивати пчолярство і ліпше ґаздувати на селі. Тоты подіі записал в повісти «Марко Шолстыс» (першій русиньскій повісти на Пряшівскій Руси). В 1904 р. о. Емілий Кубек выіхал до Зъєднаных Штатів Америкы і нашол ся в Маганой Сіті (Пенсильванія), де продолжал свою діяльніст як душпастыр, журналиста, писатель і автор церковных выдань. Занимал там ріжны і церковны, і світскы посады, будучы лідером локальной соспільности.

Його великіст достерюг Нік Купеньскій, докторант Єльского Університету (Yale University), єдной з найбарже престіжовых учелен світа, котрий, при спертю Університету Бакнеля (Bucknell University), веде проєкт, привертаючий памят о великым Русині, названий The Emil Kubek Project. Дотепер, Нік Купеньскій зобрал вшыткы творы Кубека, посеред котрых находят ся статі, дописы, стихы, оповіданя і спомнена повіст «Марко Шолтыс». Част з них переведена єст на анґлийскій язык, пошыряючы діапазон охочых познати творчіст о. Емілия Кубека (листа – за тым мотузком).

Найновшом пропозицийом проєкту Ніка Купеньского єст прогулька по місцях, звязаных з діяльністю Кубека – West End Walking Tour, котры часто были фоном подій його творів. Буде то тіж нагода одвидіти місцеву грекокатолицку церков і гріб о. Емілия Кубека, але в рамках той подіі чытаны будут тіж його творы в анґлийскій версиі, почуєте музычний перформанс, a вшытко скінчыт ся в припарафіяльным осередку, де на чест о. Емілия Кубека зрыхтуваний буде торт, понеже прогулька буде проходила 22. листопада/новембра т.р. – на ден до річниці його уродин (23. листопада/новембра 1857 р.). Попри тым, вартат припомнути, же 2015 рік то 75. річниця його смерти (17. липця/юлия 1940 р.).

Початок прогулькы заплянуваний єст на 1.00 год. пополудни, а поведут єй Нік Купеньскій (Проєкт Емілия Кубека) і Поль Кумб (Історычне Общество Обшыри Маганой). Більше інформаций найдете на сайті проєкту: kubekproject.wordpress.com і на залученым долов афішы.