Ігор Куцер заспіват пісні Юлиі Вархолы в Ню Йорку

Іщы лем заран (середа, 11. мая т.р.) русиньскій музык Ігор Куцер і його Emotion Group выступлят в Ню Йорку в піснями мамы Енді Варголя – Юлиі (з д. Завацкой). Буде то другій концерт в Ню Йорку того артисты, в рамках його турне по Зъєднаных Штатах Америкы. Перший одбыл ся в послідню неділю, 8. мая т.р. Місцьом попереднього, як і найблизшого концерту єст третій поверх Bohemian National Hall (321 E 73 Str, New York City). Початок подіі од 19.30 год. за локальным часом. Білеты на заранішній концерт мож придбати за тым мотузком.

Выконуваня пісен Юлиі Вархолы в Ню Йорку мож брати як символичне, прото же мама Андрия якысий час по еміґрациі з Пряшівской Руси прожывала, як раз, в Ню Йорку, де тепер з єй народныма русиньскыма піснями повертат Ігор Куцер. Пісні, про котры бесіда, были завдякы ініциятиві свого сына Андрия награны в 50. роках минулого столітя на платню в пітсбуржскым студию. Юлия пак послала свою платню під яличку до родины до рідного краю. Ігор Куцер в нашых часах занял ся іх дальшом аранжацийом і переспіваньом, што вказало ся в подобі выпущыня альбому з модерныма піснями в стилю world music. До платні Emotion Group были і долучены ориґінальны награня Андрийовой мамы.

Початком квітня/апріля т.р., Іґор Куцер зо своім проєктом зачал турне, о котрым м.ін. писали сме на нашым портали. Тепер, дополняме інформацию о концертуваня в ЗША.

Долов – співанка Під дубиною, під зеленою, котру співат Ігор Куцер.