Русин Михаіл Дудаш третім десятбоістом в Европі!

Найліпший десятбоіста Сербіі, Михаіл Дудаш, 8. липця/юлия заложыл бронзовий медаль на Легкоатлетичным Чемпіонаті Европы в Амстердамі, здобываючы 8.153 пункты. То загалом перший медаль для Сербіі в десятбою, а Михаіл Дудаш то Руснак з Нового Саду, котрого родиче Русины сут родом з Руского Керестура.

В єдній з найтяжшых легкоатлетичных дисциплін, т.є. в десятбою, на Чемпионаті Европы в Голяндиі 6. і 7. липця/юлия змагало ся 28 легкоатлетів. Перший ден змагань, по 5 дисциплінах, Михаіл скінчыл з 4.199 пунктами, будучы на другым місци, а пак о ден, на основі здобытых перше пунктів, впал з другого на третє місце, котре і затримал до кінця змагань.

Перше місце в десятбою припало Томасови ван дер Платсенови з Голяндиі з 8.218 пунктами, а другє занял Чех Адам Гельцелет, здобываючы 8.157 пунктів.

Михаілови, з нагоды достиженого успіху, такой в тот сам ден вінчували міністер молодежы і спорту Сербіі, Ваня Удовичич, і городоначальник Нового Саду, Милош Вучевич.

«Щыро вінчуєме Дудашови і його тімови з того успіху! То велика чест! – бесідувал медже інчыма міністер Удовичич, а городоначальник Вучевич в своіх желанях підкрислил гордіст новосадчанів і цілой Сербіі з Михаілового успіху: «Днес Михаіл Дудаш нас зробил гордыма, наш спілгромадян, котрий, в што вірю, войде до істориі, бо здобыл для Сербіі історичний перший медаль в десятбою – гварил Вучевич, додаючы, же місто Новий Сад і дальше буде давало підпору не лем Михаілови і легкоатлетам, але тіж вшыткым спортовцям.

Текст: зам/ртв,  фото: танюґ/АП – на основі материялів присланых аґенцийом Рутенпрес.