Євген Жупан: Закарпатя має мати автономію

Створіня теріторіалной автономії крымскых Татарів на Крымі буде мати діскріміначный харектер, покля презідент Петро Порошенко не зробить аналоґічны рішіня односно окремого статусу русиньской діаспоры на Закрпатю, мав повісти Євген Жупан, председа Народной рады Русинів Закарпатя, в котрій є зъєдинена векшына русиньскый орґанізацій діючіх на тій теріторії. Інформують о тім Новини Ужгорода.

Жупан припомянув, же согласно референдуму із 1991-го рока ся Закарпатя мало стати автономійов. „В 1991-ім році 78,5% жытелів Закарпатьской области проголосовали за автономію. Согласно законам із 1991-го року рішіня прияты в референдумі автоматічно принимали силу закона, но і так Закарпатю автономія не была дана і містный референдум не быв вызнаный. Значіть, de iure была выголошена автономія, а de facto Україна на своій теріторії порушує свої законы,“ цітують Євгена Жупана Новини Ужгорода.

Председа Народной рады Русинів Закарпатя далше підкреслив, же лем Україна не вызнавать Русинів. „В нас в Закарпатю суть Русины тітулным народом. Подкарпатьска Русь – то історічна земля Русинів. Вказує ся, же лем на своїй родній земли не суть Русины вызнаныма як народ. Во світі ся то бере за порушованя людьскых прав. Треба нам такый статус, якый мають і крымскы Татары. Мы не гіршы,“ пояснює Жупан.

„Хочеме свої школы, свою факулту. Тот вопрос рішаме вже 25 років. Катедра русиньского языка є на Словакії, в Мадярьску, Хорватії, Сербії. І в нас бы мала быти. Законом о языках є на Україні русиньскый язык вызнаным, єствує. Но Русины як кібы не єствовали. Як так може быти?,“ закінчує Жупан за інформаційов порталу Новини Ужгорода.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА