До Осадного принесли мощі св. Лукы Кримского

В суботу 22-го октобра 2016-го року в русинькім селі Осадне, в окресі Снина, выступав Хор духовенства Санкт-Петербурзькой метрополії. З хором пришла і делеґація Російской православной церькви з мощами святого. Інформовав о тім словацькый денник Korzár.

Хор духовенства Санкт-Петербурзькой метрополії є 30-членным хором, котрый в Осаднім выступив в рамках події Дні російской духовной културы. Осадне є за словами православного свяченика Петра Сорокы про Амбасаду Російской федерації в Словацькій републіці, яка была головным орґанізатором акції, вызначным місцьом на Словакії, бо під містнов православнов церьквов є унікатна кріпта, де є похороненых веце як тісяч вояків із І. світовой войны. На містнім цінтері є похороненых далшых 1400 російскых вояків із І. світовой войны.

За словами Петра Сорокы, концерт хору не быв лем співаньом про публіку, но головно молитвов за своїх родаків, котры суть в Осаднім похоронены.

До Осадного пришла і делеґація Російской православной церькви під веджіньом метрополіты Феодосія, якый є абсолвентом Православной богословской факулты Пряшівской універзіты в Пряшові. Делеґація на Словакію принесла мощі вызначного православного святого ХХ. столітя – Лукы Кримского, світьскым меном Валентіна Феліксовіча Войно-Ясенецького.

Святый Лука Кримскый

Святый Лука Кримскый быв архієпіскопом сімферопольскым і цілого Криму. Так само быв знаменитым хірурґом і професором медицины, і быв то як раз він, хто выдумав і в практіці як першый апліковав днесь барз росшырену локалну анестезію.

Народив ся 27-го апріля 1877-го року в Керчі в родины апатыкаря. Наперед скінчів лікарьску факулту на Київскій універзіті. В 1923-ім році, по смерти жены, уж як православный священик вырішыв быти монахом. В тім самім році ся став єпіскопом. За свою віру быв трираз арештованый совітьскыма властями і загнаный до выгнаньства. У 1942-ім році быв повышеный на архієпіскопа. На теріторію Криму ся дістав архієпіскоп у 1946-ім році, по ІІ. світовій войні. Боронив запераню старых церьквей, коло того будовав і новы. Притім архієпіскоп выконовав і свою лікарьску практіку. Святый Лука Кримскый бесплатно принимав хворых, мав дар пророцтва. Умер 11-го юнія 1961-го року на Праздник Вшыткых святых.

22-го новембра 1995-го року быв Сінодом Україньской православной церькви Московского патріархату зарахованый до лику святых. В році 1996 были його мощі перевезены до Катедралного собору Найсвятішой Тройці. В році 2000 почас юбілейного архієрейского собору Російской православной церькви быв записаный міджі новомучеників і ісповідників.

Жрідла фотоґрафій: головна – Wikipedia, фотоґрафія в статі – svluka.cz.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА