Дилемы достоменности Русинів та Шлезаків

11. січня/януара т.р. в Містецкій Публичній Бібліотеці в Руді Шлезскій буде проходила стріча з др габ. Евом Міхном – дослідничком з Ягайлоньского Університету, яка занимат ся проблематиком нацийональных і етнічных меншын. Темом стрічы буде проба порівнавчой аналізы квестий достоменности Русинів та Шлезаків. Початок стрічы то 18.00 год.

Др габ. Ева Міхна – анторполоґ, социйолоґ, адюнкт в Інституті Американістикы і Польонійных Студий Ягайльоньского Університету в Кракові, од років занимат ся социйолоґійом народу і етнічныма односинами. Веде досліджыня над бездержавныма меншыновыма ґрупами, котры борют ся о вызняня свойой достоменности. Інтересує ся справами істориі, культуры і языка етнічных меншын в Польщы – Русинів, Кашебів ци Шлезаків. Специялізує ся русиньскым нацийональным рухом в Польщы і поза єй границями з пункту пізріня социйолоґіі і політолоґіі. Єй працы тыкают справ Русинів з Лемковины, ци з Підкарпатской Руси, а од деякого часу тіж Шлезаків, якы не сут признаны законом в Польщы як етнічна меншына, о што од парох років ся борют (фурт інформуєме о тій квестиі на нашым портали, напр. гев, гев ци гев)  Др гав. Ева Міхна єст авторком вельох науковых робіт і статіі нт. проблематикы бездержавных етнічных меншын в середньо-східній Европі та двох моноґрафій: Лемкы. Етнічна ґрупа ци нарід (1995) та Етнічно-народовы квестиі на пограничу Східньой і Західньой Славянщыны: русиньскій рух на Словациі, Украіні і в Польщы (2004), а тіж спілорґанізаторком науковых конференций, посвяченых меншыновій темі. Др габ. Е. Міхна окрем наукового заниманя ся меншынами, єст тіж експертком меншыновой стороны при Спільній Комісиі Уряду та Етнічных і Нацийональных Меншын.