Акт вандалізму ци просто глупота?

Днес, то є 30. липця/юлия 2019 рока, в близкым сусідстві будинку Руской Бурсы в Ґорлицях в само полудне зачало горіти великє дерево. Возвано службы. На місци сут єдиниці протиогньовой стражы і поліциі.

Дерево, котре заняло ся огньом, находит ся за огороджыньом будинку РБ, але в барз близкым сусідстві. З бесіды з представником протигоньовой стражы дознали сме ся, што певністю было то цільове підпаліня. – То не першый уж раз, коли сме кликаны в тото місце. Хтоси цільово підкладат оген в тым дереві – повіл присутный на місци стражак. Рух на дорозі проходит на зміну, кєрує ним поліция.

Не єст знана причына, чом хтоси конечно хоче знищыти дерево, котре фунґує в місцевым реґістрі Ґміны Ґорлиці як памятник природы. Є то великых розмірів ясень, єден з трьох, якы роснут на улици Сєнкєвича. Всітри вписаны сут в реґістер.

Неє загорозы, же підпалене дерево ся завалит, але кєд акция не была бы скоро проведена, могло бы до того дойти. Подібні як могли бы заняти ся дерева уж по страні Руской Бурсы.