Андрий Копча угоноруваний нагородом Никыфора

Перешого дня Лемківской Ватры в Михалові найважнійшом подійом было вручыня нагороды Никыфора. За діяльніст на поли розвитку лемківской культуры угонорувано ньом Андрия Копчу, од 1989 рока ведучого найвекшой лемківской соспільной організациі в Польщы – Стоваришыня Лемків.

на фото – Андрий Копча як камерман на пляні фільму “Акция Вісла” част 2. © лем.фм.

Андрий Копча вродил ся 10 вересня 1954 рока, в Хобєні над Одром, на Чужыні, на землях західньой Польщы. З Лемковины родина Копчів походит зо Святковой. Лавреат преміі є театральным і фільмовым режысером, пише драмы і публицистичны тексты. Є творцьом лемківского театру, соспільным русиньскым діячом, є тіж членом Світовой Рады Русинів.