Анкєта

Сме дослідниками з Варшавского Медичного Університету, Выділу Біолоґіі Варшавского Університету і Центра Заанґажуваных Досліджынь над Культуровым Спадкобраньом на Выділі «Artes Liberales» ВУ і реализуєме проєкт, якій тыкат мікробіоты кышок. Інтересуют нас квестиі біолоґічной і культурово-языковой ріжнорідности і іх звязкы.

Чом ведеме тото досліджыня?

Основны інформациі о мікробіомі
Мікробіота кышок то ґрупа вшыткых мікроорґанізмів, якы жыют в покармовым тракті чловека. Сут то предовшыткым бактериі і вірусы, але і грибы і інчы мікроорґанізмы. Екосистема мікробіоты кышок то еволюцийно выпрацуваный пакєт мікроорґанізмів, якы спілістнуют з чловеком і сут сутьовы для правильного фунґуваня нашого орґанізму. В чловечым покармовым тракті жыют мілийоны мікроорґанізмів, а іх склад і функциі можеме ідентифікувати завдякы модерным методам секвенцийонуваня, што дозваляют познати мікробіом кышок ріжных осіб. А мікробіом кышок то ціла ґрупа ґенів, яка находит ся в покармовым тракті чловека.

Наша досліднича гіпотеза
Пропонуване досліджыня обнимат баданя чловечого мікробіому кышок в окремых языково ґрупах і вельоязычных ґрупах. Принимаме, же окремы культурово і языково ґрупы, зо взгляду на окреміст і дбаня о сохраніня традицийных культуровых практик (в тым способу жытя і дієты), мают «здоровійшу» мікробіоту кышок, в результаті чого можут быти ліпшыма донорами для трансплянтациі мікробіоты.

Наш проєкт
Проєкт закладат інновацийне досліджыня культурового дідицтва і схоснуваня його потенциялу на потребы сучасной медицины і медичной біотехнолоґіі. Жебы зверифікувати дану гіпотезу, ведеме досліджыня мікробіоты кышок ріжных окремых языково і культурово ґруп.

О што Вас просиме?

Цілый дослідничый процес складат ся з трьох етапів. В тым, першым етапі просиме Вас – Лемків (якы мают од 18 до 50 років), выполнити коротку анкєту (ок. 15-20 минут), яка тыкат стилю жытя, достоменности і локального природничого знаня. Мотузок до анкєты находит ся гев.

Хосен з досліджыня

В послідніх роках прошол великій проґрес в медичных знанях тыкаючых мікробіоты кышок. Досліджыня науковців довели до опрацуваня новых, высокоефективных метод лікуваня чысленных хворіт. Завдякы ним повело ся уж вратувати жытя вельох люди. Механізмы формуваня ся і влияня мікробіоты кышок на здоровля чловека фурт єднак не сут вполни познаны, а і схоснуваны. Ваша участ в досліджыню допоможе ліпше зрозуміти тоты процесы. Додатково, цілю нашого досліджыня єст оцінити влияня, якє на стан мікробіоты кышок мают такы факторы, як сохраніня традицийного способу ґаздуваня, поміщене в языку традицийне кулінарне і природниче знаня, а тіж почутя приналежности до локальной спільноты. Ваша околиця была выбрана до досліджынь з причыны нашого переконаня, же приметы, о якых сме спомнули, тримают ся міцнійше як в вельох інчых місцях. Як лем будут знаны результаты досліджыня, представиме іх Вашій соспільности, яка буде могла схоснувати іх згідно зо своіма потребами.

Детальны інформациі поданы сут в летучці ниже.

Ту находит ся мотузок до анкєты.

Будеме вдячны за Вашу участ в досліджыню!