Анна Горощак радном Містецкой Рады в Хоцянові

В неділю, 16. квітня/апріля 2023 р. проходили дополнюючы выборы до Містецкой Рады в Хоцянові (нижньошлезскє воєвідство).

Выборці тзв. місцевого 11 выборчого округу выберали свого представника до орґану ґміны. Перемогла наша краянка Анна Горощак, яка была кандидатком з Михалова, Жабіц і Оґродзіска.

Конкурентом Анны Горощак был Войцєх Арндт. В кампаніі, яка тырвала такой місяц, кандидатка представила свій пріоритетовый проґрам на тырваючу іщы лем рік теперішню каденцию Містецкой Рады в Хоцянові (самоурядовы выборы в Польщы пересунено на яр 2024 р.).

Пріоритеты

Нова радна за своі головны цілі поставила початок будовы дорогы на ватряне поле в Михалові, де каждого рока проходит Лемківска Ватра на Чужыні, ревітализацию пляцу забав в Жабіцах і окремо будову дорогы і пляцу забав в Оґродзіску.

«Днес уж офіцияльно хотіла бы-м сердечно подякувати жытелям Михалова, Оґродзіска і Жабіц, котры мі довірили і оддали на ня свій голос в дополнюючых выборах до Містецкой Рады в Хоцянові» – написала на своій стороні в сіти Facebook нова радна. Анна Горощак подякувала тіж вшыткым тым, якы сперали єй кампанію – то предовштыкым шолтыс Юрий Куземчак і сельска рада в Михалові, Клюб Радных Хоцянів 2023 і бургомайстер Хоцянова Томаш Ключыньскій.

Завдякы кампаніі выборці могли переконати о ся о заанґажуваню кандидаткы. Анна Горощак м.ін. через остатній місяц інформувала о підниманых діянях в Михалові, Жабіцах і Оґродзіску. В передвеликоднім часі спілорґанізувала з Реґіональным Центром Культуры варштаты малюваня яєц, якы одбыли ся трьох місцевостях, з котрых кандидатка отримала мандат. В варштатх чысленно брали участ лемківскы і польскы жытелі реґіону.

Михалівянка

Анна Горощак (з д. Шпытко) жыє в Михалові. Завершыла студиі на Вроцлавскій Політехніці в обшыри будівництва – конструкцийно-будівляна специяльніст. Професийно заряджат колективом утриманя руху і інвестиций в єдній з реґіональных спілок.

Активно діє і серед лемківской громады в Михалові, будучы членом місцевого Кружка Стоваришыня Лемків. Веде церковный хор при місцевій православній парохіі св. Михала Архангела та од років активно бере участ в Лемківскых Ватрах на Чужыні. Од 2021 р. єст членом Головного Заряду Стоваришыня Лемків.

Ґратулюєме!