Анна Плішкова у новій функції

Центер языків і култур народностных меншын Пряшівской універзіты, під котрый належыть і Інштітут русиньского языка і културы, має нову директорку. 1-го марца 2018-го ректор Пряшівской універзіты проф. ПгДр. Петер Коня, ПгД. на основі конкурзу выменовав до функції нову директорку, котров стала ся доц. ПгДр. Анна Плішкова, ПгД., дотеперішня директорка русиньского інштітуту. Інформовала о тім Кветослава Копорова.

Плішкова была веджіньом центра повірена од 1-го септембра 2017-го року, коли із функції одышов першый директор проф. ПгДр. Петер Каша, к. н., котрый быв директором од выникнутя центра у 2015-ім році. Нова директорка зіставать і директорков Інштітуту русиньского языка і културы.

Під Центер языків і култур народностных меншын належыть Інштітут русиньского языка і културы, Інштітут мадярьского языка і културы і Інштітут ромскых штудій. „В сучасности Центер реалізує 7 штудійных проґрамів на базі мадярьского і русиньского языка у вшыткых трьох ступнях высокошкольской освіты – бакаларьскім, маґістерьскім і докторьскім, а на акредітацію приправив новый бакаларьскый проґрам із заміряньом на ромскый язык і културу,“ інформовла далше Копорова.

Анна Плішкова

Анна Плішкова народила ся у 1964-ім році в Снині. В році 1987 закінчіла Філозофічну факулту Універзіты Павла Йозефа Шафарика в Пряшові – учітельство україньского языка і літературы і словацького языка і літературы, в роках 1987 – 1991 была редакторков україньскоязычных новинок „Нове життя“, в роках 1991 – 1998 была редакторков русиньскоязычных періодік – часопису і новинок Русин і Народны новинкы.

Од року 1999 є высокошкольсков учітельков русиньского языка на Пряшівскій універзіті. Є авторков трьох научных моноґрафій, авторков і сполуавторков пятьох высокошкольскых і вісем середьошкольскых учебників і понад 100 научных і одборных домашніх і загранічных публікацій. За свою роботу у сфері русиністікы была оцінена Премійов св. Кіріла і Мефодія, Премійов Антонія Годинкы і Цінов ректора Пряшівской універзіты.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА