Ансамбль Терочка має уж новы облечыня

Ярю того рока інформували сме, што ансамбль Терочка, діючый при Стоваришыню «Руска Бурса» в Ґорлицях, отримал дофінансуваня з проєкту ЕтноПольща. До тогорічной едициі проґраму зголошено близко 1500 внесків, з чого лем 300 отримало підпору. Серед выріжненых, на 61 місци – маючы 81 пунктів, нашол ся тіж внесок Стоваришыня «Руска Бурса» на закуп лемківского облечыня для Терочкы.

Хоцкі дорога до новых ансамбльовых кроів была долга і крута – повело ся. Терочка діє уж понад 10 років і через більшіст того часу члены ґрупы презентували ся в облечынях, котры мали з хыжы, часто по родичах ци дідах. Так было до часу, аж ведіня над ансамбльом перенял Андрий Трохановскій. Од того моменту колектив малыма крочками зберал свою народну ґардеробу. Зачало ся од кошель і оплічат, пак были кабаты і лайбикы. Наступным важным закупом были черевікы до гуляня. В минулым році кабаты прикрасили запаскы, а початком того рока закуплено для хлопців холошні. Од вересня/септембра ансамбль сміло може ся похвалити і презентувати в полным облечыню.

Цілю ведучого Терочкы, як і заанґажуваных в поміч при творіню новых облечынь, было як найліпше одвзорувати стары лемківскы кроі. Одтале така докладніст і старанніст при выборі материялів і взорів. З проґаму ЕтноПольща ансамбль отримал підпору в квоті 39 тис. зл, а бракуючу част покрыло Стоваришыня «Руска Бурса» в Ґолицях – понад 2,6 тис. зл.

Дівчата в зеленых кабатах і синіх ґорсетах, а хлопці під калапом

Найбільше грошів, бо аж 15 тис. зл, было выкорыстаных на вшытя і прикрашыня ґорсетів для дівчат зо старшой ґрупы. То тіж вказує, з як великыма коштами треба ся рахувати при того рода ініциятивах і чом занимают они так дуже часу. Новы ґорсеты сут в ріжных барвах – од синіх по бордовы, вышываны кольоровыма пацюрками на взір старых ґорсетів, котры колиси носили предкы членів ансамблю. Зато не сут они ідентичны і ріжнят ся кус медже собом взорами, што лем додає ім красы і автентичности.

Хоцкі більшіст ансамблю то дівчата, не мож забывати і о мужскій части ґрупы. Іщы перед реализацйом проєкту іх част ґардеробы была найліпше допосажена, бракувало лем холошен і додатків, котры дополнили бы ціліст. Холошні повело ся купити уж початком рока, а част дофінансуваня покрыла выдаткы звязаны з закупом калапів і ременів.

Терочка може ся тіж похвалити новыма членами. Завдякы дофінансуваню ансамбль міг дошыти бракуючы части ґардеробы для новых осіб, м.ін. кошелі ци кабаты.

Молодша ґрупа ансамблю Терочка тіж дочекала ся своіх облечынь

Діюча од парох років при Стоваришыню молодша ґрупа ансамблю то діти в віку од около 6. до 14. років. Тота наймолодша ґрупа свою пригоду з концертами зачала в 2019 р., але уж можут ся похвалити першыма великыма выступами, святочныма награнями, а аж і награньом платні. В іх примірі ведучы ансамблю аж тепер зачынают комплетувати ґардеробу, зато найважнійшы сут основы – сині кабатикы і білы вышываны оплічата для дівчаток, а для хлопців білы кошелі і сині лайбикы. Додатково дівчатка достали червены коралі.

Пару кадрів з осінньой сесиі Терочкы

Напевно неодолга мож буде обзерати выступы обох ґруп уж в новых облечынях, закля што презентуєме пару кадрів з осінньой сесиі ансамблю, котра прошла в Мазярскій Загороді в Лоси.