Апостол – Неділя Пасхы. Чытаня з Діл святых апостолів – неділя 11.01 год.

Чітаня з Діл святых апостолів

Теофіле, першу книгу я написав о вшыткім, што зачав Ісус робити і учіти аж до дня, коли через Святого Духа апостолам, котрых собі выбрав, дав заповіді і возніс ся на небо. Їм по своїм терпіню (на кресті) многыма правдивыма доказами свідчів, же жыє. Появляв ся їм штиридцять днів і бісідовав із нима о Царьстві Божім. А коли з нима їв, наказав їм, штобы не одходили з Єрусалима, но чекали обіцяне од Отця, “о котрім вы чули од мене”, (повів Ісус). “Бо Йоан крестив водов, но вы будете о пару днів крещены Духом Святым.” Тоты, котры были з ним, звідовали ся його: “Господи, ці уж теперь навернеш царьство Ізраілю?” Одповів їм: “Не ваша старость знати часы і рокы, котры прийдуть тогды, коли захоче Отець, но вы приймете силу, як зыйде на вас Дух Святый і будете мі свідками в Єрусалимі, в цілій Юдеї і Самарії (і всягды), аж на край землі.”

Апостол на неділі і свята в русиньскым языку выдало Общество св. Йоана Крестителя. Коректы до тлумачыня вводил екзарх пражского екзархату для грекокатоликів в Чешскій Республиці преосвященый владыка Іван Лавинець.

Апостол на неділі і свята мат імпріматур грекокатолицкого пряшівского єпархы, преосвященого владыкы Йоана Гіркы.

фото – wikimedia