У четверь 26-го новембра 2020-го року прияв архієпіскоп Кіріл Василь, апостольскый адміністратор Кошыцькой єпархії в просторах Ґрекокатолицького єпархіалного уряду в Кошыцях представителів Общества святого Йоана Крестителя (ОСЙК). Пресовый центер Кошыцькой єпархії о тім інформовало ОСЙК.
Была то перша стріча представителів того общества, котре розвивать освітню діялность меджі ґрекокатолицькыма русиньскыма віруючіма на теріторії Словакії, з владыком Кірілом, одколи быв призначеный у януарі 2020-го року за апостольского адміністратора sede plena Кошыцькой ґрекокатолицькой єпархії.
Участныма стрічі были священици Ярослав Поповець, Мартін Костілник, Мілан Ясик і Іван Барна. Владыку Кіріла поінформовали о актівностях, піблікачній діялности і планах общества. ОСЙК хоче выдати русиньскый молитвенник під назвов Радуйте ся в Господі. До друку є приготовленый і русиньскый переклад цілого Нового завіта.
Кошыцькый апостольскый адміністратор священиків повзбудив ку далшій діялности ОСЙК про духовне збогачіня русиньскых ґрекокатолицькых віруючіх, выразив їм свою підпору і дав своє благословліня. Припоминаме, же в септембрі владыка Кіріл призначів у Кошыцькій єпархії вікарів про Мадярів, Русинів і Українців.
На память першой стрічі представителів Общества святого Йоана Крестителя з владыком Кірілом передав апостольскому адміністраторови властноручно вырізавану ікону святого Дамаскіна отець Ярослав Поповець, котрый є довгорічным председом общества. На стрічі брав участь і отець Кассіан Каміл Дрозд, вікарій про русиньскых і україньскых віруючіх Кошыцькой єпархії.
Фото: ОСЙК.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі