Авторска стріча з Романом Вархолом

В найблизший віторок (то є 11. листопада т.р.) во Львові буде проходила авторска стріча з лемківскым поетом Романом Вархолом, як тіж презентация його книжкы пн. Кермеш печатаной в тым році (ґрафіка в книжці авторства Мариі Янко). Є то збірник поезиі писаной по лемківскы і по украіньскы.

Роман Вархол – поета, педаґоґ, вроджений 24. грудня 1956 рока в селі Нагірнянка чортківской области. Абсольвент Львівского Нацийонального Університету ім. Івана Франка, його філософічного факультету. Мешкат в селі Зимна Вода к. Львова. Член Нацийональной Спілкы Писменників Украіны. Автор понад тридцетьох збірників поезиі, м.ін. Бджолина келія в пущі, Троянова тропа, Чари волхва, Бармиця барв, Велесова свиріль, Руське море і інчых.  Є лавреатом медженародовой літературной преміі Світлослов. Нагороджений грамотом НСПУ. Позецию Вархола переведено на англицкій, білорускій, польскій ци румуньскій язык. Того рока Роман Вархол был єдным з запрошеных творців XXII Лемківской Тврочой Осены Крениця/Ґорлиці.

Петро Мурянка є автором музыкы до слів верша Р. Вархола  Даколи приду…, а на платни Пісні і співанкы Петра Мурянкы, част ІІ можете послухати єй в прекрасным выконаню Юлиі Дошны.

***

Даколи приду до Дунаю,
як роса і як слеза, чыстий
на фалі серце своє шмарю
і буде серце моє плысти 

через лісы зелены,
понад горы высокы
до милой, до премиленой,
до Лемковины кароокой. 

Даколи приду до Дунаю,
на дунайовий берег сяду
і буду співати пташкам з раю –
полетят пісні і коляды 

через лісы зелены,
понад горы высокы
до милой, до премиленой,
до Лемковины кароокой.

(Р. Вархол, в: Кермеш, с. 93)