«Бесіда» – на привитаня яри і во вступ до літа

Перед минулым 13. Медженародным Бієнале Лемківской / Русиньской Культуры – РутенАле (одбыло ся в днях 23.-24. мая в Креници, Устю Рускым і Высовій) явил ся дальшый номер часопису «Бесіда» – пресового орґану Стоваришыня Лемків. То ч. 2 (209) за місяці марец/квітен 2026 р.

В посліднім номері прочытаме м.ін. статі:

• Іван Поп, Підкарпатські русини в сталіньскому раю (Чорна п’ятирічка» 1945-1949) – архівный допис покійного історика Підкарпатской Руси Івана Попа (1938-2023);
• Севериян Косовскій, Епіфан Дровняк в Ліґници;
• Петро Трохановскій, Никыфор. Одкрытя едукацийной салі в Центрі Культуры в Креници;
• Андрий Копча, Мій голос о «Голосі»;
• Олена Дуць-Файфер, Більше як словник: Контекстуальный словник лемківского языка;
• Демко Трохановскій, 90 років од смерти о. Василия Масцюха – першого Апостольского Адміністратора Лемковины;
• Наталия Малецка-Новак, «Так, то єст наша штука, маме вам іщы вельо до оповіджыня».

Безмінно чытати можете част «Новины, не новины – не лем з Лемковины». Не бракує і выімків з інчых часописів і ґазет, што тыкают нашых справ.

Теперішній номер припоминат і о прекрасным ювілею 95-літя народжыня Ольгы Перегрим, акторкы Театру Стоваришыня Лемків, яка заграла такой во вшыткых його представлінях, а найбільше запамятала ся в роли Матери в фільмі Андрия Копчы «Акция Вісла».

Част тыкаюча давной і сучасной русиньской творчости приносит нам оповіданя «Розчын на Паску» авторства Петра Смереканича (1909-1997), а тіж музичный твір «Загорідочку Христос мал» до слів М. Лермонтова, якій на лемківскій язык перевюл П. Мурянка.

Єст і смутна част – де пращаме Покійного Славомира Канюка. Слово подала Наталия Малецка-Новак, та од себе окремо – шефредактор «Бесіды» Петро Трохановскій.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.