Богослужыня на Горі Явір. В плянах новий православний монастыр

В неділю Самаритянкы, 6. мая т.р. вірны православной церкви брали участ в посвячыню креста під будову монастыря на луках під Св. Гором Явір в Высовій, а пак в Божескій Літургіі, інформувал о тым офіцияльний сайт ПАПЦ.

Посвячыня креста довершыл Архієпископ Паісий, владыка православной перемышльско-ґорлицкой єпархіі. Крест станул на ділянці находячій ся на пути з Высовы в сторону Гору Явір, котра належыт православній Церкви. В плянах ПАПЦ є побудуваня на ній православного монастыря.

Пак, вірны брали участ в Божескій Літургіі на Св. Горі Явір, яку очелил владыка Паісий при участи о митр. Василя Ґалчыка, резидента ґорлицкой кафедры, о. митр. Вoлодислава Канюка, пароха Ганчовы, о. ігумена Максима, настоятеля православного мужского монастыря Покоровы Пресвятой Богородиці, находячого ся в центрі Высовы, та о. єродіакона Августина. В проповіди архієпископ Паісий высловил м.ін. надію на побудуваня в будучым нового монастыря, під котрий того дня был вознесений крест.

Припомнийме, што на ниві спору о деякы лемківскы храмы, будучы по акциі Вісла власністю державы, а в хоснуваню православной Церкви, тырвал і  судовий процес о правну властніст каплиці на Святій Горі Явір помедже Польском Автокефальном Православном Церквю та Украіньском Грекокатолицком Церквю в Польщы. Влони, властніст каплиці припала УГКЦ. Православна Церков є властительом ділянкы на лівым боці од каплиці, де од тамтой поры сут правлены православны богослужыня.

фот. www.orthodox.pl