Буковскый: Охрана материньского языка в меншыновім середовиску є важна

На путь безконечного познаня, од першых знань аж по творіня слов, котры творять думкы і саму особностну ідентіту, веде чоловіка материньскый язык.

З нагоды Меджінародного дня материньского языка, котрый собі припоминаме 21-го фебруара, то підкреслив уповномоченый влады Словацькой републікы про народностны меншыны Ласло Буковскый. Інформовала о тім аґентура TASR. Буковскый єдночасно акцентовав роль хоснованя і захованя материньского языка в штоденнім жывоті членів народностных меншын.

Уповномоченый з нагоды свята звернув увагу на факт, же якраз в меншыновім середовиску материньскый язык часто вычерять державный язык.

„Посліднє списованя жытелів знова потвердило, же в припаді народностных меншын є їх материньскый язык огроженый. Чісло жытелів з меншыновым материньскым языком ся знижує,“ припомянув.

Охрана материньского языка зато подля Буковского не є яловым ділом. „Міцно є повязана із захованьом ідентіты і охранов языковой розмаїтости і културной дідовизны,“ арґументує. Членів народностных меншын зато вызвав, жебы хосновали свої языковы права на вшыткых уровнях.

„Представителів публічного сектора зясь вызывам, жебы окрім тых обовязків, котры їм становлює леґіслатіва, апліковали вшыткы языковы права народностных меншын в штонайшыршім розсягу,“ підкреслив уповномоченый Буковскый.

Меджінародный день материньского языка выголосила 30-та ґенерална конференція Орґанізації зъєдиненых народів про выхову, науку і културу (UNESCO) в новембрі 1999-го року. Вална громада ОЗН вызвала членьскы державы, жебы „підтримовали захованя і охрану вшыткых языків хоснованых народами світа“.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА