Буковскый: Списованя потвердило мултіетніціту Словакії

Списованя жытелів, домів і квартелів 2021 знова потвердило, же Словакія є мултіетнічнов країнов, в котрій коло себе жыє майорітне словацьке населіня і членове народностных меншын.

Конштатує то уповномоченый влады Словацькой републікы про народностны меншыны Ласло Буковскый.

„Є барз важным, жебы собі народностны меншыны знали свої оправданы потребы наформуловати з цільом розвивати свою ідентічность і бороти ся з асімілачным трендом. Но без ефектівной сполуучасти державы і самосправных орґанів то не принесе очекованый ефект. Як уповномоченый буду і зо своїм урядом при досягованю тых цілів далше актівный,“ пише у своїм становиску ку списованю Буковскый.

Публікованы резултаты подля нього прозраджають вельо о етнічнім походжіню гражданів і оддзеркалюють образ словацькой сполочности. Так само говорить, же при выповніню вопросів у гражданів міцну роль мало повязаня ку етніціті, но даны не выповідають о тім, як ся гражданы в штоденнім жывоті ставляють ку своїй ідентічности.

Уповномоченый влады підкреслив, же політіци і представителі народностных меншын мусять брати до відома обєктівны резултаты і зачати з нима робити.

„Жебы народностну політіку поставили на реалных фундаментах з реалныма цілями, в котрых найде ся каждый член народностной меншыны. Словакія не сміє забыти на своє цінне і розмаїте културне і языкове богатство.“

Буковскый думать, же є потрібне порозуміти цілям і потребам народностных меншын, і так помагати заховати богату ідентічность Словакії. Так само припомянув, же на основі узнесіня Выбору про народностны меншыны і етнічны ґрупы буде фунґовати робоча ґрупа на інтерпретацію резултатів списованя.

„Членове про робочу ґрупу суть уж номінованы. Очекуєме, же в близкій будучности одбуде ся засіданя,“ додав уповномоченый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА