Буковскый стрітив ся з представителями меншын Босны і Герцеґовины

Уповномоченый влады Словацькой републікы про народностны меншыны Ласло Буковскый прияв у віторок 12-го новембра 2019-го року Франя Ровера, председу Союзу народностных меншын в Републіці Сербскій і Маю Кременовіч, предсидательку Рады про народностны меншыны в Републіці Сербскій.

О приятю делеґації заступаючой народностны меншыны з Босны і Герецеґовины інформовав офіціалный сайт уряду уповномоченого.

Порадный орґан парламенту

Як написав Ласло Буковскый на своїм офіціалнім сайті на сіті Facebook, по стрічі з Франьом Ровером і Майов Кременовічовов мусить конштатовати, же дакотры елементы народностной політікы можуть быти хосенны і про Словацьку републіку.

Союз є неполітічным здружіньом гражданів, котре має Републіков Сербсков уділену позіцію здружіня з окремым публічным інтересом. Рада має законом встановлены компетенції. Є порадным орґаном Народного згромаджіня в Републіці Сербскій (парламенту). Задачов є слідовати леґіслатівны і іншы приписы в области охороны прав членів народностных меншын, як і партіціповати на задачах Народогно згромажіня в Републіці Сербскій і співпрацовати на вшыткых уровнях властей в Босні і Герецеґовині, а і з меджінародныма інштітуціями.

Познакомили ся зо сітуаційов на Словакії

Буковскый делеґацію інформовав о сітуації народностных меншын на Словакії і познакомив їх о досягненых резултатах при аплікації меншыновых прав.

Навщіва з Републікы Сербской за інформаціями офіціалного сайту уряду уповномоченого оцінила головно партіціпацію штатной справы і народностных меншын у Выборі про народностнны меншыны і етнічны ґрупы, як і вытворіня Фонду на підпору културы народностных меншын.

Так само делеґація інформовала і дала комплексный образ о правах народностных меншын в Републіці Сербскій, і о сітуації меншын в другій части федерації. Наперек складній і у великій мірі непровидній сістемі, дакотры законом ґарантованы права і вырішуючі механізмы можуть быти подля Буковского прикладом і про приготовльованый закон о народностных меншынах на Словакії.

В рамках федерації Босна і Герцеґовина суть вызнаны італійска, укркаїньска, русиньска, албаньска, жыдівска, словацька, словіньска, македоньска, ромска, австро-німецька, чеська, чорногірьска, мадярьска, польска, російска, турецька і румуньска меншына.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА