Буковскый їднав о двоязычности в реґіоналнім здравотництві

Уповномоченый влады Словацькой републікы про народностны меншыны Ласло Буковскый стрітив ся у віторок 17-го авґуста 2021-го року з міністром здравотництва Владиміром Ленґварьскым. Інформовав о тім Уряд уповномоченого на своїм офіціалнім сайті.

„Уряд уповномоченого влады СР про народностны меншыны уж при приготовліню оцінкы о хоснованю меншыновых языків, котра передкладать ся владі СР, зістив, же в области здравотництва суть великы недостаткы і треба ся заміряти на одстраніня тых проблем,“ пише ся на сайті уряду.

Хоць парадоксно пандемія помогла просадити языковы права меншын, головно при публікованю основных інформацій і наряджінь, котры дотуляють ся хвороты Covid-19, уряд звертать увагу на то, же у додавателів здравотницкой старостливости майже цалком бракує означінь, інформацій і написів про паціентів у меншыновых языках.

Головнов проблемов просаджованя двоязычности має подля уряду быти факт, же додавателі і зряджователі собі не усвідомлюють свої обовязкы, котры выходять із меншынового языкового закона.

„Дотулять ся то значной части пріватных здравотницькых заряджінь і заряджінь, котры належать під высшы теріторіалны цілкы (крайску самосправу, позн. ред.),“ пише ся на сайті уряду з тым, же цільом стрічі уповномоченого з міністром было найти сполочны пункты при просаджованю прав у тій области.

Ласло Буковскый привітав конштруктівну і меріторічну стрічу з міністром Ленґварьскым, котрый приобіцяв інтензівну співпрацу меджі Міністерством здравотництва Словацькой републікы і Буковского урядом на вакціначній кампані в меншыновых языках. Так само ся доїднали, же в слідуючіх місяцях приготовить ся зміна леґіслатівы і інштрукція, котра злегшать просаджіня меншыновых языковых прав у реґіоналнім здравотництві.

„Меншыновы языковы права в области здравотництва суть довгодобо мімо публічного інтересу і лем з часу на час приходять ініціатівы од гражданів. Мойов намагов є, жебы літера закона, котра бісідує о обовязку публіковати вшыткы інформації о охороні жывота і здравя і в меншыновім языку, была дотримана. Не знам собі представити ідеалнішу і важнішу область як є сектор здравотництва,“ повів Буковскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА