Голосник

Бусів. На направду найвысшым верху Низкого Бескіду

В попереднім одтинку природничых прогульок познали сме туристичный шляк на Лацкову, найвысшу гору по польскій стороні Низкого Бескіду. А чом бы не піти на найвысшу гору цілого Низкого? Прецін тото місце не находит ся так далеко од Лацковой, а тіж єст інтересуюче і не менше дикє. Бесіда буде о Бусові – єдиній горі, высота котрой то більше як 1000 метрів. Ходме в такым разі на гірскій трекінґ.

Бусів (1002 м н.м.) єст найвысшом гором Низкого Бескіду. Находит ся около 5 кілометрів на полудне од пасма Лацковой, уж по словацкій стороні. Єст він кульмінацийом невеликого пасма з том самом назвом. През Бусів веде лем єден туристичный шляк зеленого кольору. На гору мож войти од двох сторон, або од села Цигелька, або од Ґабольтова. Днешню прогульку зачнеме од Цигелькы през Бусів до Ґабольтова як раз.

До Цигелькы найліпше доіхати автом. Од польской стороны найскорше буде нам іхати на граничный перехід в Мушынці. Можеме тіж приіхати од стороны Конечной, а пак през Бехерів, Бардиів аж до Тарнова. Там нам треба скрутити на Свержів. Дальшы села то уж спомянуты Ґабольтів і Цигелька. Авто можеме оставити або в єдным, або в другым селі. На жаль, будеме пак мусіли вернути ся по нашу машыну піше по асфальтовій дорозі, але околиця єст така красна, же напевно не буде то для никого проблемом. Єдно, што треба повісти уж тепер, же так в Ґабольтові, як і Цигельці на перифериях прожыват ромскє населіня. Може быти так, же будеме обєктом заінтересуваня ромской соспільности. Возме тото до увагы.

Як уж сме в Цигельці, то зачнийме нашу прогульку. Підхід од той стороны єст труднійшый, бо на трасі 3,5 кілометра выходиме під гору аж 513 метрів. Але вірте мі, же вартат! Будеме іти перше долином глубокого яру, аж по около 1,5 год. дойдеме на сам верх Бусова. По дорозі стрітиме ся з річом барз рідком і барз інтересуючом – в описуваным пасмі мож найти дикій чеснок, якій росне барз богато в тых лісах, а особливо ярю пахне чудово! Што мусите знати, то тото, же ціла гора єст покрыта лісом, а з самого Бусова тіж вельо не буде видно, окрем пейзажів на околичны бескідскы горы. Але можеме вписати, же сме здобыли найвысшый пункт Низкого Бескіду до памяткового зошыту, якій находит ся в скриночці, што повішена на дереві. Пак приде уж нам лем сходити долину в напрямі на Ґабольтів. Вандрівка буде уж ішла легше, а з полян над самым селом будеме мочы смотрити пейзажы на Лелюхівскы Горы, якы зачынают ся по другій стороні. Шляк до Ґабольтова то тіж около 1,5 год., коли зыйдеме на 4 кілометрах праві 600 метрів долину. В центрі Ґабольтова кінчыт ся наша прогулька і буде треба нам вернути до авта. Але кєд буде в Вас більше часу, то рекомендую іщы видіти цигельскы озерка і джерела. Можеме до них дойти синім шляком з села – прогулька не буде долга, а вартат, бо бесідуют, же місцевы джерела сут найбарже змінералізуваныма на Словациі!

На конец выявлю Вам секрет. Як не мате авта, або не хочете робити біциґльовой прогулькы по словацкых дорогах медже гірскыма селами, то на Бусів мож выйти одраз з Высовой! Лем докладаме до нашой вандрівкы близко 5 кілометрів. Справа ся нияк не комплікує, бо зачынаме в центрі Высовой і ідеме на зеленый шляк, тот сам, якій нас доведе на верх Бусова.

Джерелa знимок:
фот. 1, 2, 5, 6, 7 – сайт Pohorie Busov – 1002 m n. m.
фот. 3, 4 – www.mapa-turystyczna.pl
мапа: www.mapa-turystyczna.pl

Шеруй.

О авторі

Jakub Zygmunt

Лях зо Санча. Ґеолоґ, але на штоден робит в інчых професиях. Знат 5 языків, але на ЛЕМ.фм хоснує лем два з них. Любит вандрувати, неконечні там, де вшыткы люблят.

Коментарі