Чергова стріча при радошыцкым джерельци

Ґміна Команча, Грекокатолицка Парохія в Команчы і Ґмінний Осередок в Команчы просят на XVII Радошыцкє Джерелко – Стрічу при Граници, яка буде проходила 2. липця/юлия т.р. од 12.00 год.

Подія зачне ся од богослужыня при радошыцкій капличці Положыня Пояса Пресвятой Богородиці, пак выступлят: народна капеля Пясты з Місця Пястового, Братя Ярош з Радошыц, ансамбль Лопєнка з Цісной, А Де То Давнійше Строіло з Коросна, а звіздом вечера буде ґрупа Чачі Ворба з Люблина. Як додаткова атракция в пляні сут VI змаганя древорубачів.

В місци, де побудувано капличку, при котрій буде проходило богослужыня, выбиват джерело з водом, яка має мати оздровлюючу силу. Фондатором першой капличкы был радошыцкій духовний. Побудувал єй в 1878 році в подякуваню за оздоровліня тяжко хворой дівкы. Од того часу благодійне джерелко зачали одвиджати поломникы з обох сторін Карпат. Што рока орґанізувано при каплици кєрмешы. В час війны каплицю знищено, а люди з того лемківского села выселено. Під конец ХХ столітя за стараньом о. Йоана Піпкы каплицю одбудувано і од 2000 рока зас рік-по-році зачато стрічати ся при чудотворным джерелі.

Фото. горі: beskid-niski.pl.