Чірч хоче розбудовати школу. Хотять другый ступень і умелецьку школу

В русиньскых селах на Словакії суть векшынов два припады. Будь в них є школа, котра каждым роком має менше школярів, або уж в них ани не є школы, кедьже середній вік на нашых селах росне, і молоды одходять з реґіону.

В селі Чірч в окресі Стара Любовня є цалком іншый припад. Капаціта основной школы з матерьсков школов уж не старчіть, жебы мати повноцінне фунґованя. Село хоче капаціту розшырити розбудованьом школы, што бы ся мало фінанцовати з еврофондів.

Староста села Михал Дідік про аґентуру TASR повів, же мають вже приготовленый проєкт, включно ставебного позволіня. Вытраты рахують на уровни міліона евр.

Хотять другый ступень

Школярі другого ступня мусять теперь доходити до школ в селах околіці. Подобна сітуація є подля старосты в многых селах Словакії.

„Родічі школярів нашой школы, до котрой ходить коло 80 дітей на першім ступні, мають інтерес о повноорґанізовану школу – то значіть першый і другый ступень. Приставбов розшыриме капаціту о сто процент. Выбудуєме три новы класы, але і класы про фахове навчаня про другый ступень,“ говорить староста з тым, же ку тому прибудуть і далшы просторы про школярів а учітелів.

„Прибудуєме модерну часть, де буде мати своє місце і основна умелецька школа,“ приближыв планы директор школы Мілан Вархола. Зрдяжіньом другого ступня выникнуть і новы робочі місця, школа хоче дати роботу молодым педаґоґам із села.

Матерьска школа ся вже розшырьовала

Школа в селі Чірч в минулости вже перешла часточнов реконштрукційов, котра принесла шпорованя енерґій. Но в сучасности їм платбы за електрику наросли о 60 процент.

„То грошы, котры бы сьме могли схосновати цалком іншак,“ конштатовав Вархола з тым, же помочі од державы затля не дочекали ся. Піднятя цін енерґій подля нього найвеце буде чути школьска їдалня, котра стравує 140 дітей і робітників школы.

Вдяка фінанчній дотації в сумі 320 тісяч евр з резорту внутрішніх справ самосправа перед штирьома роками уж реконштруовала і розшырьовала матерьску школу. Того часу знають мати в матерьскій школі аж 46 дітей, што є двараз веце, як то было перед розшыріньом. Наперек тому і теперь мають іщі невыбавлены жадости.

Роснутя чісла жытелів і дітей село приписує будованю новых арендованых кавртелів, будованю локаліт на выставбу родинных домів, і потрібной інфраштруктуры.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА