Чірч здобыв дві оцініня в цілословацькім конкурзі

19-го октобра 2017-го року проходило святочне вручаня оцінінь селам, котры ся запоїли до конкурзу Село рока 2017 (Dedina roka 2017). Оцініня представителям успішных сел вручав міністер жывотного оточіня Словацькой републікы Ласло Шоймош в Оравскій Полгорі.

Святочне вручаня оцінінь было зорґанізоване в смыслі конкурзных условій і правил селом, котре было цілковым вітязом і орґанізатором конкурзу Словацьков аґентуров жывотного оточіня. Хоць цілковым вітязом конкурзу Село рока 2017 стала ся Оравска Полгора, успішный быв і русиньскый Чірч, котрого староста Михал Дідік привіз домів такой дві оцініня.

Чірч, котрый ся до конкурзу приголосив першыраз, быв оціненый в катеґорії Село як партнер, а перше місце село дістало і в інтернетовім голосованю людей.

„Дякую вшыткым нашым співгражданам за вшытко, же наше село просперує і видиме, же ідеме правилным напрямом. Іщі раз велика подяка і тым, котры нам посылали голосы,“ інформовав на совїм профілі на сіті Facebook староста Дідік.

Конкруз Село рока проходив вже по девятый раз. Тот рік ся до нього запоїло двадцять сел із цілой Словакії, котры собі зміряли силы в презентації резултатів досягненых коло їх обновы і розвитку. Цільом конкурзу є презентація красы, унікатности і успіхів сел, підниманя знань гражданьской сполочности о вартости країны, но і підниманя конкуренціїспособности сел на Словакії.

Конкурз быв выголошеный Міністерством жывотного оточіня Словацькой републікы, Словацьков аґентуров жывотного оточіня, Обществом про обнову села і Здружіньом міст і сел Словакії.

Жрідло фотоґрафії: Михал Дідік

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Повязаны дописы

Коментарі

Польковиці 103,8 МHz
Ґорлиці 106,6 MHz