Здружіня інтеліґенції Русинів Словеньска (ЗІРС) орґанізує далшу діскузію в рамках цікла Стрічі коло Дунаю. Тот раз буде подія присвячена поглядам на всокочіня русиньского языка.
До діскузії суть запрошены Люба Кральова – соціолоґічка і основателька Обчаньского здружіня Колысочка, котре орґанізує русиньскы вечурны школы і Петро Крайняк – новый державный тайомник на Міністерстві школства, наукы, досліджіня і шпорту Словацькой републікы.
Як пише у запрошіню орґанізатор події – Здружіня інтеліґенції Русинів Словеньска, на зачатку події будуть презентованы резултаты теренного соціолоґічного досліджіня із 2015-го року під назвов „Обявльованя берьєр себерефлексії властной ідентічности у Русинів і їх повязаня із (не)вжываньом ґарантованых людьскых прав на Словакії,“ котре было реалізоване ЗІРС-ом, і котре є тісно повязане із головнов темов події. На події буде так само представлене фунґованя вечурных школ русиньского языка, а презентовати ся будуть і заміры новой словацькой влады в области реґіоналного і меншынового школства на основі Проґрамового выголошіня Влады Словацькой републікы.
Стріча одбуде ся 21-го апріля 2016-го року о 17.00 год. в Конґресовім центрі Высокошкольского інтернату Універзіты Коменьского „Дружба“ на уліці Botanická 25, в Братіславі.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі