Далшых понад 800 тісяч евр до польско-словацького приграніча через Interreg

На розвиток польско-словацького приграніча іде далшых веце як 800 тісяч евр із Фонду малых проєктів Проґраму Interreg. Як інформовала говоркыня Пряшівского самосправного краю (ПСК) Даша Єленьова, партнеры схоснують фінанції на общі ініціатівы в области освіты, шпорту, културы і турістічного руху.

Помочі ся має і укріпліню співпраці, безпекы і взаємных звязів на теріторії. Реалізовати ся буде довєдна 16 новых черезгранічных проєктів, включно замірів ПСК.

Комітет про малы проєкты Фонду малых проєктів Проґраму Interreg Польща – Словакія 2021 – 2027 на своїм засіданю 13-го авґуста 2026-го року схвалив 16 новых проєктів, і схвалена фінанчна підпора представлює суму 808 тісяч евр.

„Фонф малых проєктів вказує, же спаяньом сил із нашыма польскыма сусідами знаме створити дашто, што служыть людям в обидвох державах. Притім не іде лем о інвестіції до драговой ці біціґльовой інфраштруктуры, але і о общі актівности в културі, освіті, шпорті ці турістічнім русі. Якраз такы проєкты творять простор про стрічаня людей, черяня скушеностей і будованя односин, котры суть про розвиток приграніча важныма,“ повів председа ПСК Мілан Маєрьскый.

До реалізації актівностей залучіть ся довєдна 34 партнерів із Словакії і Польщі. Спомянеме холем дакотры із схваленых проєктів.

Крайска бібліотека Павла Орсаґа Гвієздослава в Пряшові вєдно із Воєводьсков і містьсков публічнов бібліотеков у Ряшові має схваленый проєкт під назвов Будуєме жывы бібліотекы. Дотыкы традіцій Карпат – то проєкт, котрый буде реалізовати Крайскый музей в Пряшові вєдно із Окружным музейом в Ряшові.

Місто Ясло вєдно із містом Бардейов а Реґіоналным музейом в Яслі зреалізують вдяка підпорі із Проґраму Interreg проєкт під назвов Турістіка без граніць – Ясло і Бардейов.

Русиньске село Бехерів вєдно із Союзом ґмін басейну Віслокы має схваленый проєкт під назвов Черезгранічна польско-словацька співпраца на высшій уровни – ІІ. етапа.

Село в місті є далшым схваленым проєктом. Стоїть за ним Фундація Руського клубу 1923 із Пряшова вєдно з Реґіоналным центром култур приграніча з Польщі а безпрофітовов орґанізаційов Здружіня про розвиток реґіону із Словакії. Припоминаме, же з Фундаційов Руського клубу 1923 русиньска орґанізація Руськый клуб 1923 довгы рокы веде судный спор о то, хто є властником Руського дому в Пряшові.