Дария Кузяк на стрічы в міністры. Лемківскій голос в дискусиі о уставі для артистів

Лемківска артистка Дария Кузяк нашла ся в ґрупі творців, котры были запрошены на пресове сніданя в Міністерстві Культуры і Нацийональной Спадковины. Стріча одбыла ся з участю міністры Марты Цєнковской і тыкала рыхтуваного проєкту уставы о социяльным забезпечыню осіб, котры выконуют артистичну професию.

В подіі участ взяло шестеро артистів, якы репрезентували ріжны обшыри штукы. Окрем композиторкы Дариі Кузяк присутны были: Анна Орска – проєктантка біжутериі, Малґожата Русєцка – малярка і проєктантка, Антоніна Конопельска – мултімедияльна артистка, Марцін Куберна – творця керамікы, та різбяр Норберт Дельман.

Артисты зышли ся в Варшаві, жебы оповісти о реалиях творчой роботы. Як реляцийонує Дария Кузяк, бесіда тыкала і потребы введіня новых переписів, як і обав артистичного середовиска. «Ішло о тото, жебы медиі і дециденты почули голос артистів і ліпше зрозуміли нашу штоденніст».

Лемківскы елементы

Підчас бесіды каждый з участників міг запрезентувати свою діяльніст. Дария оповіла м.ін. о опері інспіруваній лемківском культуром. Aртистка підкрислила, же твір возник з єй ініциятивы, а реализация прошла во спілпрацы з лемківскым середовиском і інчыма творцями. Звернула так само увагу на специфіку композиторской роботы – ноты самы в собі не істнуют вполни без выконаня, а процес творіня вымагат часу і заанґажуваня.

Тема оперы заінтересувала участників і журналистів, якы звідували ся о дрібниці проєкту уж по офіцийній части стрічы.

Підчас візиты Дария Кузяк передала міністрі символичны подаркы – триптих «Переселили нас мусово. Листы Лемків з років 1947-1948» печатаны Лемківскым Ансамбльом Пісні і Танця «Кычера», та кривульку зроблену мамом Дариі.

Устава для артистів – системова зміна

Проєкт уставы о социяльным забезпечыню артистів має одповідати на реалиі творчой роботы. Як підкрислят Міністерство Культуры, іде о особы, якы фунґуют поза етатовым системом, часто без стабільных доходів і доступу до социяльных забезпечынь. «Не іде о привілегіі, але о основну безпеку для люди культуры» – зазначат в комунікаті міністра Марта Цєнковска.

Дария Кузяк звертат увагу, же хоц сама в тым моменті ся не кваліфікує до той помочы, то може мати великє значыня для молодшых артистів.

Творчіст Русинів в світі

Артистка оповіла тіж о найновшым творі, котрый мал недавно правыконаня в престіжным Carnegie Hall в Ню Йорку.

Lemko Association та Ars Activa Foundation зорґанізували гын 27. мая 2026 рока двогодинный концерт пн. «Карпаторусиньска Рапсодия». Проґрам подіі поділеный был на дві части. В першій публика могла почути традицийны реліґійны пісні і народну музику. Друга част концерту обняла выбраны клясичны творы русиньскых композиторів і творы інспіруваны спадковином реґіону.

Mісце в проґрамі мала тіж творчіст Дариі Кузяк. Єдным з выконаных творів была єй найновша композиция зрыхтувана як раз на концерт в Carnegie Hall.

Твір, написаный на гушлі соло і смыковый квінтет, інспіруваный є лемківском весільном традицийом і співом жен. Артистка навязує до звыку, в котрым голос молодиці «заступує» спів дружок і свашок. Композиция вказує тоту перспективу через музичну форму.

Як підкрислят Дария Кузяк, джерелом інспіраций были архівальны материялы, награня, але тіж особисты досвідчыня.

Фот. Приватны материялы Дариі Кузяк