Давна архітектура підкарпатского воєвідства

Початком текучого рока, Соваришыня Про Карпатія з Ряшова выдало нову книжку, присвячену світскій деревяній архітектурі прикарпатского і карпатского реґіону п.н. «Давна ахітектура підкарпатского воєвідства». В альбомі, в котрым находит ся вельо архівальных фотоґрафій презентуючых світску архітектуру того реґіону Польщы, мож найти і тематичны статі, написаны через специялистів. Внутрі книжкы найдеме дописы:

• Войцєха Драґана з Музею Народной Штукы в Кольбушовій, котрий написал текст про деревяне будівництво на териториі давной Сандомірской пущы (Лясовякы) та в водозливі середнього і нижнього Вислока (Жешовякы);
• Дануты Блін-Ольберт з Музею Народного Будівництва в Саноку, котра печатала пару текстів про народне будівництво серед Бойків, Лемків, Погірян та Долинян;
• Януша Мазура з Музею Кресів в Любачові – про деревяну світску архітектуру любачівского повіту;
• Томаша Філозофа з Державной Высшой Східньоевропейской Школы в Перемышли, котрий зложыл текст про архітектуту підкарпатскых курортів;
• Ґражыны Стояк з Ряшівского Університету (бывша Воєвідска Консерватор Забытків), котра пише о деревяных дворах на Підкарпатю.

Публикация являт ся цінна не лем за реченыма статями, але і з опубликуваныма в ній архівальныма фотоґрафіями, часто дотепер незнаныма, котры презентуют незаховану світску архітектуру підкарпатского воєвідства. Стоваришыня Про Карпатія печатало уж інчы публикациі, котры посвячены сут як раз архітектурі реґіону. Старчыт посмотріти на пропозициі книжок презентуваных на сайті выдавництва. Найти мож серед них м.ін. Лексикон деревяной сакральной архітектуры підкарпатского воєвідства (2015) ци Давна і сучасна архітектура Бєщадів і Низкого Бескіду (2010).

Як інформує выдавця – книжка є безплатна і мож єй одберати в сідибі Стоваришыня Про Карпатія в Ряшові. Долов пару выімків з публикациі.