Давна Річпосполита – спільна ци зосварена?

В найблизшу пятницю, 13. жолтня/октобра, в Медженародным Центрі Культуры в Кракові пройде панельова дискусия нт. давной Річпосполитой. Участникы спрібуют одповісти на звіданя про взаімны односины векшыны з меншынами – ци была то спільнота, ци може сконфліктуване середовиско. 

Подія проходит в рамках ІІІ Конґресу Заграничных Дослідників Діів Польщы, якій в Кракові oрґанізуваний є в днях 11.-14. жолтня/октобра т.р. під наголовком Давна Річпосполита: істория – спадковина – памят. 

Беручы участ в дискусиі займут ся м.ін. проблемом памяти серед наций, што творили давну Річпосполиту, а на переломі ХІХ/ХХ ст. постепенно принимали властну народову свідоміст. Єдным з такых народів были Русины, якы на польскій териториі компактно заселяли обшыр Лемковины – пілнічной части Карпатской Руси. Покля што наука шырше ся не занимала порівнаньом тых процесів, а серед народных історийоґрафій видний є брак взаімных односин до пункту пізріня сусідів. Прото основным буде поясніня, чым для каждого з реченых народів є ґрупова памят і на якым етапі сут досліджыня повязаны з темом в поєдных державах світа. 

Семінаристы задумают ся і над тым, в якій спосіб народы постерігали свою історию в контексті приналежности до давной Польщы протягом послідніх сто років. Звіданя тыкати ся будут історичной політикы так заборців, як і дальше комуністичного блоку. Зато тіж порушена буде тема того, ци в хоц-якым вымірі можлива є днес спільна памят про давну Річпосполиту, ци она памят ділит, ци лучыт в сфері підходу державы до заселяючых ю народів. 

Інформациі про участників чытайте за мотузком.