Інтерес о окресы Бардейов і Свідник росне. Пріорітов суть турісты із Польщі

В окресах Бардейов і Свідник заевідовали за першый піврік 2026-го року понад 112 000 переночовань. По прирахованю літніх місяців – юл і авґуст, бы їх чісло могло досягнути од початку рока 160 000. Велику часть загранічных навщівників творять турісты із Польщі.

Аґентуру TASR о тім інформовав директор Областной орґанізації турістічного руху Шаріш – Бардейов Радомір Янчошек.

„Сумарізачный аналітічный погляд на попередній період дає комплексный образ о тім, же Шаріш дефінітівно етабловав ся як міцный і повноцінный конкурент найвеце навщівльованых турістічных реґіонів на цілій Словакії,“ повів Янчошек.

Понад 112 000 переночовань за першый піврок 2026-го року є чісло, котре выходить із даных Штатістічного уряду Словацькой републікы.

„Тот резултат потвердив, же першых шість місяців в році не было глухым періодом, але, навспак, періодом із высоков інтензітов хоснованя готелів, пензіонів і лічебных домів, причім росли і фінанчы приймы тых, котры додавають уквартельованя, што мало позітівный вплив на локалну економіку і утримательность робочіх місць в цілім реґіоні,“ інформовав Янчошек.

Сусідня Польща є подля Янчошека про окресы Бардейов і Свідник абсолутнов загранічнов пріорітов, і найміцнішым стратеґічным резервоаром навщівности. Турісты із Польщі штораз інтензівніше обявлюють северовыходну Словакію, і їх присутность в цілім пригранічнім реґіоні є видіти.

Офіціалны піврічны штатістікы вказують, же в цілковім обємі вшыткых уквартельованых было 30 процент із заграніча. Чісло польскых гражданів ся дістало на уровень 14 000.

„Вдяка такому дінамічному приходу гостів собі польскы навщівници укріпили свою позіцію домінантной загранічной силы, причім в цілковій штруктурі чуджінців їх частка в реґіоні пересягує граніцю 40 пріоцент.“

Кулмінація першого піврока настала подля Янчошека в юні, коли наповно почала літня сезона. В окресі Бардейов быв головным мотором початок головной купельной сезоны в Бардейовскых Купелях. Вєдно з тым окрес Свідник профітовав із міцной турістікы заміряной на воєньску історію на Дуклі, музеї і деревяны храмы.

Фото: FB/Expozícia ľudovej architektúry – skanzen.