24-ый апріль – то дата народжіня Александра Духновіча, а єдночасно і дата, котру выбрали собі в рамках Світового конґресу Русинів Русины на Україні як День Русина. Тогорічны святкованя проходили у Виноградові і Мукачові уж через вікенд.
Тот рік святкованя і дакус округлы, бо припоминаме собі 215 років од народжіня найвекшого із русиньскых будителів.
В пятніцю 20-го апріля в пополідняйшых годинах у Виноградові в просторах Містьского будинку културы проходила подія під назвов День русиньской културы. Як інформовав портал Голос Карпат Юрій Продан, голова Закарпатьского областного науково-културолоґічного общества ім. Александра Духновіча, фестівал проходив уже шестый раз. На фестівалі выступали колектівы із Виноградівщіны, Іршавщіны, Мукачівщіны і Ужгорода. В рамках події одбыла ся і презентація новой книжкы русиньского пистеля Михайла Чухрана під назвов Фейсбук-фіґлі. Общество Духновіча не забыло ани на будителя. Юрій Продан вєдно із Іваном Бушком в пятніцю під памятник Духновіча у Виноградові за участи русиньской громады поклали квітя.
В Мукачові в суботу 21-го апріля проходив головный проґрам святкованя, котрый орґанізовав член Світового конґресу Русинів за Україну – Крайове общество підкарпатьскых Русинів.
День Русина одбыв ся у Мукачівскім драматічнім театрі. Подія традічно почала, як інформовав Юрій Шиповіч, ходом ку памятнику Духновіча, котрый стоїть в центрі міста. І в Мукачові поклали квітя ку будительови і продовжовали торжественным концертом, на котрім выступали домашні солісты і ансамблі як Мірослава Копинець, Серґій Савчук, Фатьове ці Бабчіна співаночка. Публіці одпрезентовали ся і два ансамблі зо Словакії.
В рамках проґраму быв выголошеный і лавреат Літературной премії Івана Петровція, котрым тот рік став Володимір Рошко, русиньскый поет, науковець і педаґоґ.
Жрідло фотоґрафії: Юрій Шиповіч.
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА