В пятницю, 11. марця т.р., во Свиднику одбуде ся концерт з нагоды Медженародного Дня Жен, на котрым найдут ся і русиньскы акценты. Подія пройде од 16.30 год., в Свидницкым Домі Культуры.
Хоц концерт одбуде ся три дні пізнійше, Медженародний Ден Жен є векшыном світа признаний на ден 8. марця. Свято тото было встановлене в 1910 році, як пошана для жертв в борбі за зрівнаня прав жен з мужчынами.
З той нагоды, на концерті заспіват выдатна русиньска співачка Анна Порачова, котрій буде товаришыла ціла єй родина. Попри тым, свій выступ даст тіж Дітячий Фолькьорний Ансамбль Маковичка, котрий наштоден фунґує при старшій, більшій Маковици.
Анна Порачова народила ся в русиньскым селі Кыів, в окресі Стара Любовня. Є то співачка, котра выконує русиньскы, шаришскы та духновны пісні. Порачова є лавреатком центрального чехословацкого перегляду пісні Маковицка Струна. Через рокы свойой музычной діяльности была звязана з такыма ансамблами як Карпатянин, Шаришан, Ториса, Земплин ци Сабиновчан. Співачка выступує в вельох проєктах, м.ін. з OĽUN-ом (Оркєстра Народных Інстументів Словацкого Радия), а посліднім часом єй голос маме змогу чути в ансамбли Кандрачовці. В своій музычній карєрі Порачова выпустила 5 сольовых платен.
Долов можете пізрити на єден з выступів Маковичкы.
Коментарі