Днесь зачінають святкованя Дня Русинів у Сербії

За інформаціями аґентуры Рутенпрес днесь зачінають у Сербії святкованя Дня Русинів, котрый быв про Сербію схваленый на 17-тый януар.

День Русинів Сербії є встановленый на 17-тый януар із нагоды припоминаня собі дня, коли у 1751-ім році радця Марії Терезії і адміністратор Кральовско-державного Бачского діштрікту в Зомборі Франц Йозей де Редл підписав першый урядный документ – Контракт о насельованю 200 русиньскых ґрекокатолицькых родин зо Земпліна до втогдышнього Великого Керестура. Тот день бере ся за день насельованя Русинів на тоты теріторії. Датум Дня Русинів Сербії прияв ся у 2007-ім році і першыраз святковав ся у 2008-ім році.

Днесь, 15-го януара, зачінають святкованя у Суботіці, Шіді, так само в Коцурі і в Новім Саді. В суботу будуть святковати у Вербасі і в неділю, коли буде точный датум Дня Русинів, святкованя будуть проходити у Дюрдьові, Ґосподінцях, Новім Орахові і Бікічу. Свята закінчать ся в понедільок, 18-го януара, в Руськім Керестуру в просторах Дому културы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА