Дні Габуры

Фундація Деревяна церковця Габура вас запрошать на 13-тый річник події під назвов Дні Габуры. Подія буде проходити в днях 3-го аж 5-го юла 2015 р.

Пятніця 3-го юла несе назву Ніч під памятником князя Лабірце. Од 16.00 год. зачне реґістрація участників, котры під голым небом пережыють ніч. Но і в тот день на участных чекать културный проґрам і честованым гостьом вечора буде Мірослав Клусак, правнук армадного ґенерала Людвіка Свободы, в котрого армаднім корпусі бойовали Русины почас Другой світовой войны.

Субота буде належати културному проґраму на габурьскім амфітеатрі. О 11.00 год. святкованя зачне Божественнов літуґійов в Церькви св. Михаила Архістраты, і такой по тім одкрыє ся в просторах Сельского уряду в Габурі выставка. Од 14.30 год. аж до пізной ночі на амфітеатрі участных чекать богатый проґрам, де ся одпрезентують многы ґрупы, колектівы і солісты народной співанкы, но і модерной музикы. Головныма тяглами будуть Піддукляньскый умелецькый народный ансабель, ці музикант, композітор і співак русиньского походжіня Маріян Чековскый. Проґрам будуть модеровати акторы Театру Александра Духновіча в Пряшові Ярослава Сисакова і Михал Ільканін.

В неділю в Габурі буде проходити 13-тый річник Меморіалу Владиміра Онуфрака і пополідне ся навщівници можуть тішыти на фотбаловы змаганя команд із Габуры, Пряшова, Свідника і Команчі.

Детайлный проґрам долов на плаґаті.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА