Дни русиньскых звыків і традиций села Камюнка (перша част) – субота, 15.00 год.

Кінцьом грудня/децембра 2016 р. в селі Камюнка на Спишы торжественно одсвяткували Дни русиньскых звыків і традиций. Перша част той подіі одбыла ся в камюнчаньскій церкви свв. Петра і Павла. Зачала ся словом котре выголосил о. Франтішек Крайняк єден з русиньскых лідерів заслужений для вводжыня русиньского языка в літурґічным просторі.

Зато на зачатку, по русиньскы, вызвучал Рождественний Молебен, котрий ослужыли протопресвітер Ярослав Матоляк з Попраду, парох зо Шамброна – Павел Секели і з Камюнкы – Франтішек Крайняк. Потім мож было слухати концерт коляд. В концертовій части выступили запоряд: ґрупа Поляна з Орябины, Вородай з Великого Липника, Бетярі з Мукачова, Ролянд Ґуба і братя Зятикы з Лабірця, хор фарности з Попраду і як ґазда Барвінок з Камюнкы.

Просиме слухати ретрансмісию першой части того концерту і позерати на фотоґрафіі з той подіі.