Мадярьска Народна выборча комісія у віторок 10-го септембра 2019-го року вылосовала чісла, під котрыма будуть іти кандідачны спискы до выборів до народностных самосрпав, якы будуть проходити 13-го октобра вєдно із комуналныма выборами.
В Мадярьску є тринадцять вызнаных народностных меншын, котры собі можуть выбрати свої меншыновы самосправы. Подля мадарьской державной аґентуры MTI комісія до віторка вечур заевідовала 19 народностных кандідачных списків, причім порядок списків лосовала в припаді 9-ох народностей.
Штири народности – булгарьска, німецька, словіньска і словацька, собі зареґістровали лем по єднім списку кандідатів, зато дістали од Народной выборчой комісії чісло 1. Вылосованы чісла служать на зараджіня кандідачных списків окремых номінуючіх орґанізацій на цілодержавный лист голосованя.
Русины мають три спискы
Найвеце кандідачных списків із вшыткых меншын, цілково сім, зареґістровали собі Ромове. Русинів буде мож выберати із трьох списків.
Як інформовав портал Hirado.hu, чісло єден за русиньску меншыну дістав кандідачный список Общества русиньской інтеліґенції імени Антонія Годинкы. Чісло два было вылосоване про Общество русиньской меншыновой солідарности. З чіслом три буде кандідовати список Общества Русинів/Рутенів Мадярьска.
Русиньскы меншыновы самосправы
Русины бы собі на основы даных з препису населіня із 2011-го року будуть в октобрі выберати склад 44-ох містных самосправ. Жебы могла выникнути меншынова самосправа, мусить в окрузі жыти подля офіціалных даных мінімално 25 людей, котры ся приголосили ку меншыні, якой самосправа там має выникнути.
Меншыновы волителі ся мусять зареґістровати до 27-го септембра. Покля є в реґістры меншыновых волителів записаных менше як сто людей, будуть собі членове меншыны выберати трьох представителів до самосправы. Пять представителів буде мати самосправа, покля є меншыновых волителів мінімално сто або веце.
Вседержавна самосправа
Выборами сформує ся і нова Вседержавна русиньска самосправа. Тота має 15 членів. Подля того, кілько процент здобуде цілково в містных самосправах окрема меншынова орґанізація, котра зареґістровала кандідачный список, буде мати і кількость членів вседержавной самосправы.
Покля ся член меншыны приголосить до меншынового реґістра, вже не має можливость голосовати за спискы політічных партій в комуналных выборах.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Коментарі