Долгій вікенд в природі

Хвилю перед тогорічным туристичным сезоном працівникы Надлісництва Дукля рыхтуют нову забудову знаного шатрового поля при резерваті Долина Яселкы.

Комплет елементів малой архітектуры при місци паркуваня авт «Стасяна» має пробний характер і вводит ся го в рамках розвиткового проґраму Великій лісовий пут туристикы, реляксу, істориі і едукациі реалізуваного через Державны Лісы.

Іщы выгіднійше для туристів

Побудувано уж дві альтаны, якы можут помістити до 8-ох осіб, поставлено лавостолы, стояк на роверы, стіл достосуваний для осіб на інвалідскых візках, лавкы, браму до ліса та кошы на смітя. Ціліст заперта є огороджыньом, што ся складат з 43-ох части.

Од пару дни обсервуєме збільшений рух на паркінґу, затримуют ся головні особы, котры карпатском трасом іхают в Бєщады, але сут і постійны туристы того поля, а тіж приізджают люде аж і з цілой Польщы – бесідує Збіґнєв Жывєц, надлісничий Надлісництва Дукля. – Елементы малой архітектуры сут тестуваны, зато сме заінтересуваны реакциями туристів і охочо выслухаме уваг, жебы схоснувати іх при дальшых реалізациях.

Закінчыня робіт і одданя цілости передвидуване є на конец квітня/апріля. Доступніст обєкту поправит ведений як раз ремонт дорогы з Тылявы до Яслиск, а неодолга роверовы туристы будут мочы хоснувати іщы новы трасы на обшыри сусіднього Надлісництва Рыманів, якы реалізуваны сут в рамках польско-словацкой спілпрацы.

Прогулькова база

Паркінґ «Стасяна» то ідеальний пункт початку трасы на верх Пітроса – так до выселінь называли гору Лемкы, тепер хоснуване є званя Петрусь – (728 м н.р.м) та на природничу стежку «В долині Яселкы».

Жебы з шатрового поля з паркінґом дойти до початку природничой стежкы, треба підыйти близко 400 метрів вгору вздолж Яселкы зеленым путом, якій веде через Остру Гору до Зындрановы. Долгіст стежкы, котра має форму колеса, то нецілы 4 км. Спокійным кроком треба 2 годин, жебы єй перейти. На трасі находит ся 7 пристанків: Резерват природы Долина Яселкы, Окопы, Ґеолоґія, Гірска яворина, Лемківска дорога, Дубово-грабовий ліс та Долина Яселкы.

Лемківска дорога

Єдным з пристанків природничой стежкы, до котрой мож дойти зо змодернізуваного паркінґу «Стaсяна», є Лемківска дорога. То означыня давной дорогы побудуваной через Лемків, котра давала можніст експльоатувати ліс на убочах Острой та дойти з худобом на поляны. Тепер неє уж полян-паствиск, а і дорогы нихто не хоснує. Через выселіня ґаздуючых Лемків неє, а на тій обшыри утворено резерват. Єднак дорога дотепер ся одзначат.

Резерват Долина Яселкы оснований был в 1976 р. Його простір то близко 124 га, а находит ся на ним вельо рідкых і особливых рослин, нп. папротины струсьове перо звычайне ци єленячий язык. Зо звірят стрітити гын мож выдры, куны, єлені, серны, дикы, крукы, крикуны ци астрябы. Своє місце мают в резерваті тіж м.ін. гірскій кумак, карпатска трашка, огняча салямандра, жывородна веретурниця ци ідовита змия.

Фот. krosno.lasy.gov.pl