Другій Маґурскій Ультрамаратон

Краса верхів Лемковины, бескідской природы притігат што раз веце люди і што раз частійше. Окрем збільшеного чысла туристів, звекшат ся кількіст ріжных акций і подій, якы проходят на Лемковині. Русиньскы хыжы, хоц тых уж як мало, деревяны церкви, придорожны кресты, дикы сады в опустошеных селах, ци схованы в травах і лісах воєенны цмонтері – то уж атракциі не лем для выробленых вандрівників, якы преферуют мало ходливы пути і непопулярну туристику, але тіж для… спортовців.

Заран, 20. серпня/авґуста, буде проходил 2. Маґурскій Ультрамаратон. То змаганя в літаню, якых трасы вызначены сут на обшыри Лемковины. То уж чергова того рода подія, котра нашла своє місце в обшыри Низкого Вескіду. Другом таком єст напр. Лемковина Ультра Терйль, яка од парох років проходит на осін.

Стартуючы в Маґурскым Ультрамаратоні до выбору мают трасы о двох долгостях – 55 і 85 км, але траса єст так сконструувана, же рішыня о долгости курсу мож конечні підняти навет вчас змагань. Старт і мета находят ся в Крампній, а місце в котрым мож летіти іщы дальшы кільометры находит ся в Ожынній. Долша траса, на дистансі 85 км, была цертифікувана через Медженародове Стоваришыня Літаня Ультра (ITRA) і єст єдным з курсів квалифікуючых до Ultra-Trail du Mont-Blanc (UTMB) – єдного з найтякжых тереновых змагань в літаню в Европі.

Мапкы кадиль переходит траса і де мож видіти літачы позерайте долов.