Дуляровы Братя ідут на Пряшів

Ансамбль з Лемковины – Дуляровы Братя – в найблизший четвер, 9. лютого/фебруара, заграт концерт в Пряшові. Не буде то іх перший раз в тым місті, понеже грали в центрі русиньской культуры уж перше. В четвер од 16.00 год. заграют в літерацкій кавярни Viola. Вступне на концерт то 5 евро і як пишут орґанізаторы – Дуляровы то лемківскій ансамбль, якій в своім репертуарі вказує варияцию ріжных музычных жанрів з лемківском нотом.

Выстпуліня ансамблю головно інтересне може быти для жыючых в Пряшові Русинів не лем зато, же Дуляровы в своім найновшым репертуарі грают істо по русиньскы, но тіж з причыны модерного цікавого стилю іх граня. Припомнийме, же ансамбль влони стараньом Общества Руска Бурса з Ґорлиц выдал свою першу офіцияльну платню пн. Мельодиі. З репертуаром, якій ся на ній находит, мали нагоду уж парураз выступувати серед домашніх Русинів.

Концерт може явити ся і зато цікавым, же Дуляровы Братя по части продолжают зачату Руском Бурсом моду на выдаваня і граня авторской творчости. Зачало ся од выданя двох части пісен і співанок найвыдатнійшого сучасного лемківского літерата Петра Мурянкы, дальше – орґанізациі І Фестівалю Лемківской Авторской Творчости «Молода Лемковина», зато і платня Дуляровых ідеально вписує ся в тоту задуману од зачатку мысель, жебы промувати шырше русиньску (не лем народну) творчіст. Так, в іх репертуарі одтепер почути мож Мурянковий Шковраночок ци В темну нічку, котрой автором слів є Семан Мадзелян, а музыку, на основі народных мотивів скомпонувал Маестро Лемковины – Ярослав Трохановскій. Серед пісен з лемківского боку Карпат находит ся тіж Співанка до слів Учытеля Івана Русенка. Русинів з Пряшівской Руси заінтересує напевно і тото то, же Дуляровы сігают тіж по добрі ім знаний репертуар, співаючы м.ін. твір Світ місячку, якій – што, на жаль, не є часто припоминане – є авторском співанком, написаном Штефаном Лукацком.