Дуже лемківского на тогорічным Святі Меду і Вина в Пшемкові

В днях 23.-24. вересня/септембра т.р. в Пшемкові на Нижнім Шлеску пройде XVIII Свято Меду і Вина. Хоц передвидуваны проґрамом подіі будут в суботу і неділю, то о тогорічній едициі свята мож написати, што є ціловікендова, понеже товаришучы акциі мают проходити уж в пятницю, 22. вересня/септембра. 

Пшемківскє Свято Меду і Вина з рока на рік стає ся шырше знаном імпрезом в нижньошлезскым воєвідстві, притігаючы не лем Пшемківян і околичных селян, але тіж і люди з другых части Польщы. Приміром того сут чысленны становиска продуцентів меду і вина, якы на свято приізджают і з інчых воєвідств. Серед проґрамовых колективів тіж находят ся ґрупы з цілой Польщы. 

Свято Меду і Вина то подія, на якій стрічаме ся і з лемківскыма ансамблями. Того рока заповіджено штоси нового, што буде присвячене лемківскій культурі – ходит о специяльну проґрамову част, котрій дано наголовок «На лемківску нуту». Наша культура буде рядила в недільне пополудня, медже 15.00 а 19.00 год. Серед лемківскых колективів, якы дадут товды выступ, находят ся домашній ЛАПіТ «Ластівочка», діючий при тамтшышнім Кружку СЛ, дітяча ґрупа Ластівчата, дует Сестры Бочнєвич та роково-фолькова ґрупа КульБаба. 

За традицийом Свята Меду і Вина недільна святочна Літургія проходит каждого рока в інчым храмі в місті. Того рока богослужыня за участи чысленных делеґаций пчолярів будут служены в римокатолицкым костелі в центрі Пшемкова. Присутны на них будут і священникы православной та грекокатолицкой Церкви, якы ґаздами святочной Літургіі будут в будучых роках подіі.