Двотонова церков

В саноцкым Домі Культуры Пухатек од 7. мая т.р. мож видіти выставу ґрафік Збіґнєва Осенковского. Артиста вродил і выховал ся під Саноком більше як 70 років тому, зато мал тоту вантпливу приємніст быти свідком заміреного вынищыня і затрачыня культурового доробку жытелів полудньово-східньой Польщы. Свойом творчістю реґіструє спадковину м.ін. Лемків ци Бойків, жебы наступным поколіням передати памят о забытках, якы вытворили тоты, котры жыли перед нима і в більшости могли, а часом іщы можут, быти лем гостьом в своіх місцях.

Любителі деревяной архітектуры, церкви і костелів полудньовой Польщы будут мочы подивляти іх красу в виді професийных ґрафік на саноцкій выставі до 20. мая.

Збіґнєв Осенковскій – ґрафік, публициста, культурний і соспільний діяч. По професиі механік о специяльности будова авт і тракторів Краківской Політехнікы і абсольвент Студиюм Індустрияльного Дізайну Інституту Дізайну Академіі Красных Штук в Варшаві.

Більше як 40 років робил як специялиста конструктор, стиліста в конструкцийным бюрі та як кєрівник в фабриці автобусів Автосан в Саноку. Тепер на емеритурі. Ґрафіком і рисунком занимал ся од все, а од 1980 рока занял ся тіж проєктуваньом екслібрісів. Іх темом є найчастійше деревяна архітектура, але тіж коні, Санок, Швейк, горы і інчы. О успіхах артисты в тым виді творчости свідчыти може факт, же його біоґрам та репродуцкиі 30 выбраных книгознаків поміщено в енцикльопедиі, печатаній в 2004 р. в Портуґалиі, пн. Сучасны медженародовы творці екслібрісів (анґ. Contemporary International Exlibris Artists).

Брал участ в більше як 150 выставах в Польщы, Европі і дале (Арґентина, Кытай, Казахстан, Мексик). Был угоноруваний вельома выріжнінями та грамотами в медженародовых конкурсах. Своі працы робит ріжныма техніками, але найбільшу приємніст справлят артисті творіня ліноритів. В його опініі вказуют они неординарне і фінезийне вычутя куншту і свободу композициі.